Нурсултан назәрбайеф бүгүн қәсәм берип вәзипә тапшурувалди вә мәсимофни йәнә һөкүмәт тәшкилләшкә буйруди

Назәрбайеф өткән йәкшәнбә күни елип берилған президентлиқ сайлимида мутләқ көп санлиқ аваз билән йәнә бир нөвәтлик президентлиққа сайланған, лекин сайлам кишилик һоқуқ тәшкилатлириниң тәнқидигә учриған иди.

Назәрбайеф шу күни қәсәм берип вәзипә тапшурувалғандин кейин, қазақистан баш министири кәрим мәсимоф вә униң ички кабинти истепа бәргән.

Арқидин назәрбайеф йәттәсулуқ уйғурлардин болған мәсимофни қайта қазақистан баш министирлиқиға тәйинләп, уни һөкүмәт тәшкилләшкә буйруған. Шу күни қазақистан парламенти мәсимофниң һөкүмәт тәшкиллишини тәстиқлиған.

Қазақистан қануниға асасән мәсимоф 10 күн ичидә һөкүмәт тәшкиллиши керәк. Назәрбайеф йәкшәнбә күнки сайламда 95% аваз билән президентлиққа сайланған иди. Лекин явропа бихәтәрлик -һәмкарлиқ тәшкилати намидин сайламға көзәткүчилик қилған назарәтчиләр, биләт ташлаш җәрянида “җиддий қанунсизлиқлар” ниң байқалғанлиқини билдүргән.

Назәрбайеф вәзипә тапшурувелиш мурасимида сөз қилип, “җәмийәтниң демократийилишишини давамлиқ алға сүридиғанлиқи” ни тәкитлигән.

Қазақистандики бу қетимқи сайлам оттура шәрқтики хәлқ исянлири таза әвҗигә чиққан бир мәзгилдә елип берилди бу мунасивәт билән көзәткүчиләрниң диққити қазақистан өктичи партийә -гуруһлириниң сайламға қандақ инкас қайтуридиғанлиқиға буралған иди.

Сайлам мәзгилидә сабиқ қазақистан муавин ташқи ишлар министири, назәрбәйефниң австрийидики сабиқ күйоғли раһәт әлийеф сөһбәт елан қилип, назәрбайефниң хитай билән, қазақистан земинидин хитайға терилғу йәр иҗарә бериш вә шундақла қазақистанда хәлқ исяни йүз бәрсә, хитай азадлиқ армийисиниң қазақистанға кирип исянни бастуруп бериш мәзмунида мәхпий келишим имзалиғанлиқини илгири сүргән болсиму, лекин бу қазақистан һөкүмити вә яки қазақистандики һәр қандақ бир өктичи партийә вә ахбарат оргини тәрипидин дәлилләнмиди.