Nursultan nazerbayéf bügün qesem bérip wezipe tapshuruwaldi we mesimofni yene hökümet teshkilleshke buyrudi

• Muxbirimiz erkin
  2011-04-08

Nazerbayéf ötken yekshenbe küni élip bérilghan prézidéntliq saylimida mutleq köp sanliq awaz bilen yene bir nöwetlik prézidéntliqqa saylan'ghan, lékin saylam kishilik hoquq teshkilatlirining tenqidige uchrighan idi.

Nazerbayéf shu küni qesem bérip wezipe tapshuruwalghandin kéyin, qazaqistan bash ministiri kerim mesimof we uning ichki kabinti istépa bergen.

Arqidin nazerbayéf yettesuluq Uyghurlardin bolghan mesimofni qayta qazaqistan bash ministirliqigha teyinlep, uni hökümet teshkilleshke buyrughan. Shu küni qazaqistan parlaménti mesimofning hökümet teshkillishini testiqlighan.

Qazaqistan qanunigha asasen mesimof 10 kün ichide hökümet teshkillishi kérek. Nazerbayéf yekshenbe künki saylamda 95% awaz bilen prézidéntliqqa saylan'ghan idi. Lékin yawropa bixeterlik -hemkarliq teshkilati namidin saylamgha közetküchilik qilghan nazaretchiler, bilet tashlash jeryanida “Jiddiy qanunsizliqlar” ning bayqalghanliqini bildürgen.

Nazerbayéf wezipe tapshuruwélish murasimida söz qilip, “Jem'iyetning démokratiyilishishini dawamliq algha süridighanliqi” ni tekitligen.

Qazaqistandiki bu qétimqi saylam ottura sherqtiki xelq isyanliri taza ewjige chiqqan bir mezgilde élip bérildi bu munasiwet bilen közetküchilerning diqqiti qazaqistan öktichi partiye -guruhlirining saylamgha qandaq inkas qayturidighanliqigha buralghan idi.

Saylam mezgilide sabiq qazaqistan mu'awin tashqi ishlar ministiri, nazerbeyéfning awstriyidiki sabiq küy'oghli rahet eliyéf söhbet élan qilip, nazerbayéfning xitay bilen, qazaqistan zéminidin xitaygha térilghu yer ijare bérish we shundaqla qazaqistanda xelq isyani yüz berse, xitay azadliq armiyisining qazaqistan'gha kirip isyanni basturup bérish mezmunida mexpiy kélishim imzalighanliqini ilgiri sürgen bolsimu, lékin bu qazaqistan hökümiti we yaki qazaqistandiki her qandaq bir öktichi partiye we axbarat orgini teripidin delillenmidi.