Украинийә билән хитай истратегийилик шериклик мунасивити орнатқанлиқини елан қилди

Хитай дөләт рәиси ху җинтав билән украинийә президенти януковеч икки дөләтниң истратегийилик шериклик мунасивити орнатқанлиқини елан қилди. Ху җинтав билән яноковеч дүшәнбә күни икки тәрәпниң бу һәқтики бирләшмә ахбаратиға имза қойған.
Мухбиримиз әркин
2011-06-20
Share

Ху җинтав, сабиқ хитай дөләт рәиси җяң земин 2001‏-йили украинийини зиярәт қилип 10 йилдин кейин, мәзкур дөләтни зиярәт қилған тунҗи хитай рәһбири. Анализчилар, хитай украинийә билән һәрбий, авиатсийә вә аләм бошлуқи җәһәттики һәмкарлиқни күчәйтишкә алаһидә қизиқидиғанлиқини илгири сүрмәктә.

Украинийә сабиқ совет иттипақиниң муһим авиатсийә, аләм бошлуқи, кемисазлиқ вә һәрбий санаәт базилириниң бири иди. Сабиқ совет иттипақи парчиланғандин кейин, бу йәрдики санаәт әслиһәлири украинийигә мирас қалған. Анализчиларниң илгири сүрүшичә, ғәрб әллири хитайға қорал-ярақ ембаргоси қойғанлиқтин хитай изчил украинийә һәрбий әслиһәлиригә қизип кәлгән.

Хитай илгири украинийиниң "варяг" намлиқ авиаматкисини сетивелип, мушу асаста авиаматка ясашқа башлиған иди. Хитай авиаматкисиниң мушу 2-3 йил ичидә пүтүп, һәрбийләргә тапшурулидиғанлиқиға даир хәвәрләр бар.

Украинийиниң һазирқи русийәпәрәс президенти януковеч 2010‏-йили президентлиқ тәхтигә чиқип, сабиқ президент юшенкуниң ғәрбкә йеқинлишиш сияситини өзгәрткән вә хитай билән мунасивәтни күчәйтишкә башлиған иди. Ху җинтавниң украинийә зияритидә икки тәрәп имзалиған сода тохтами үч йерим милярд доллардин ашқан шундақла хитай украинийигә бир милярд доллар қәрз беришкә мақул болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт