Xitayda bir kün ichide 12 kishining ölüm jazasi ijra qilindi

Birleshme agéntliqining xewer qilishiche, 52 yashqa kirgen lyu jüyxung bu yil 6-ayda xunen ölkisining changsha sheherlik baj idarisige partlatquch madda tashlash netijiside 4 kishi ölüp, 17 kishi yarilan'ghan idi.

Da'iriler eyni chaghda weqening sewebi heqqide lyu famililik bu kishi tijarette weyran bolghanliqining xapichiliqida bundaq bir weqeni qozghighan, dep chüshendürgen. Emma eyni waqitta ehwal inkas qilghan yerlik kishiler bajgirlarning ushshaq tijaretchilerdin qalaymiqan baj yighip, chiriklik qilghanliqidin tijaretchilerning buningdin qattiq narazi bolghanliqini inkas qilghan idi.

Xitay 2007-yilidin étibaren xelq'ara jem'iyetning bésimi bilen ölüm jazasi bérish délolirigha aliy sotning qarap chiqishini békitken idi. Xitay aliy sot mehkimisi peyshenbe küni lyu jüyxung we bashqa 11 kishige bérilgen ölüm jazasini ijra qilishni testiqlighan. Adette xitayda ölüm jazalirigha testiq sélin'ghandin kéyin derhal ijra qilinidiken.

Xelq'araliq hoquq teshkilatlirining melumatlirigha qarighanda, xitayda yiligha 4000 etrapida kishining ölüm jazasi ijra qilinidu, téxi yéqindila b d t kishilik hoquq komitéti xitaydiki ölüm jazalirining sanini azaytish, bolupmu siyasiy jinayetchilerge bérilidighan ölüm jazasini toxtitish heqqide teklip sun'ghan idi.