Pakistandiki ömer Uyghur wexpi pa'aliyetlirini janlandurmaqta

Ötken yilning axiridin bashlap, pakistandiki ikkinchi ewlad Uyghurlar ömer Uyghur wexpi namida teshkilat qurghan we Uyghurlar arisida medeniy - ijtima'iy pa'aliyetlerni élip barmaqta idi. Bu teshkilat bu yilning béshida ana til mektipi achqan idi. Yéqinda ular yene, mektepte kompyutor meshq sinipi échish üchün teyyarliq xizmetlirini bashlighan.

Ömer Uyghur wexpi bu yilning béshida 4 - fiwral ghulja weqesini, yéqinda yene 5 - iyul ürümchi weqesini xatirilep pa'aliyet ötküzgen. Pakistandiki Uyghur jama'itidin igiligen melumatlirimizgha qarighanda, pakistandiki Uyghur yashlirining mezkur teshkilatning etrapigha yighilishi, pakistandiki xitay elchixanisimu heriketke keltürgen.

Igilishimizche, xitayning pakistan elchixanisi ömer Uyghur wexpining pa'aliyetlirini diplomatik yollar arqiliq chekligendin bashqa, türlük ijtima'iy we teshwiqat wastiliri arqiliqmu tosushqa urunmaqta.

Pakistandiki xitay elchixanisi bu qétimqi héyt mezgilide Uyghurlarni ziyapetke teklip qilip, roza héytini tebrikligen we özlirining Uyghurlar üchün xitayche mektep échip béridighanliqini uqturghan. Héyt ziyapitige az sanda Uyghurlar qatnashqan. Ziyapetke qatnashquchilarning ömer Uyghur wexpi bilen alaqe qilmasliqi telep qilin'ghan.

Bu heqte pakistandiki xitay elchixanisigha téléfon qilghinimizda, elchixana xadimliri ziyaret qobul qilalmaydighanliqini bildürdi.