Өркәш дөләт хитайни лю шавбони қоюп беришкә чақирди

1989‏ - Йилидики тйәнәнмен оқуғучилар һәрикитиниң сабиқ рәһбири өркәш дөләт пәйшәнбә күни сөһбәт елан қилип, хитай даирилирини нобел тинчлиқ мукапатиниң бу йиллиқ саһиби лю шавбони қоюп беришкә чақирди.
Мухбиримиз әркин
2010-11-11
Елхәт
Пикир
Share
Принт

У пәйшәнбә күни нобел тинчлиқ мукапати саһиблириниң японийидә чақирилған дуняви учришишиға қатнишиш мунасивити билән сөһбәт елан қилип, "гәрчә лю шавбониң қоюп берилиши әмәлийәттин йирақ болсиму, лекин мән йәнила хитай даирилирини лю шавбони қоюп беришкә чақиримән" дегән.

Өркәш дөләт японийиниң хирошима шәһиридә ечилидиған нобел тинчлиқ мукапати саһиблири йиғининиң тәклипигә бинаән японийигә кәлгән болуп, у җүмә күни бу йиғинда нутуқ сөзләйду. Өркәш дөләтниң тәйвән ахбарат вастилиригә әскәртишичә, у бу йиғинниң лю шавбо мәсилисигә көңүл бөлүшини үмид қилған.

Өркәш дөләт йәнә, хитай даирилиридин лю шавбониң аялини нәзәрбәндтин бошитип, униң йолдишиға вакалитән нобел тинчлиқ мукапатини тапшуривелишиға йол қоюшини тәләп қилди.

Нобел комитети бу йиллиқ тинчлиқ мукапатиниң түрмидики хитай өктичиси лю шавбоға берилгәнликини елан қилғандин кейин, хитай даирилири униң аялини нәзәрбәнд астиға алған.

Хитай һөкүмити һәтта явропа әллири вә японийә қатарлиқ дөләтләрдин нобел тинчлиқ мукапатиниң тарқитилиш мурасимиға қатнашмаслиқини тәләп қилған иди. Хирошимадики бу йиғин америка президенти обаманиң сеулда ечилған 20 дөләт гуруһиниң йиғиниға қатнишип қайтишида японийини зиярәт қилип өтидиған мәзгилгә тоғра кәлгән. Йиғинни тәшкиллигүчиләр обаманиң йиғинға қатнишишини үмид қилған болсиму, лекин обама рәт қилған болуп, униң позитсийиси йиғин әһлини үмидсизләндүргән иди.

Херошимадики учришишқа нобел тинчлиқ мукапатиға еришкән шәхсләрдин сабиқ совет иттипақи президенти горбачеф, сабиқ чех президенти васлав хавел, тибәт роһани даһиси далай лама қатарлиқ 10 дәк шәхсниң қатнишидиғанлиқи пәрәз қилмақта.

Пикирләр (0)
Share
Толуқ бәт