Örkesh dölet xitayni lyu shawboni qoyup bérishke chaqirdi
Muxbirimiz erkin
2010.11.11
2010.11.11
U peyshenbe küni nobél tinchliq mukapati sahiblirining yaponiyide chaqirilghan dunyawi uchrishishigha qatnishish munasiwiti bilen söhbet élan qilip, "gerche lyu shawboning qoyup bérilishi emeliyettin yiraq bolsimu, lékin men yenila xitay da'irilirini lyu shawboni qoyup bérishke chaqirimen" dégen.
Örkesh dölet yaponiyining xiroshima shehiride échilidighan nobél tinchliq mukapati sahibliri yighinining teklipige bina'en yaponiyige kelgen bolup, u jüme küni bu yighinda nutuq sözleydu. Örkesh döletning teywen axbarat wastilirige eskertishiche, u bu yighinning lyu shawbo mesilisige köngül bölüshini ümid qilghan.
Örkesh dölet yene, xitay da'iriliridin lyu shawboning ayalini nezerbendtin boshitip, uning yoldishigha wakaliten nobél tinchliq mukapatini tapshuriwélishigha yol qoyushini telep qildi.
Nobél komitéti bu yilliq tinchliq mukapatining türmidiki xitay öktichisi lyu shawbogha bérilgenlikini élan qilghandin kéyin, xitay da'iriliri uning ayalini nezerbend astigha alghan.
Xitay hökümiti hetta yawropa elliri we yaponiye qatarliq döletlerdin nobél tinchliq mukapatining tarqitilish murasimigha qatnashmasliqini telep qilghan idi. Xiroshimadiki bu yighin amérika prézidénti obamaning sé'ulda échilghan 20 dölet guruhining yighinigha qatniship qaytishida yaponiyini ziyaret qilip ötidighan mezgilge toghra kelgen. Yighinni teshkilligüchiler obamaning yighin'gha qatnishishini ümid qilghan bolsimu, lékin obama ret qilghan bolup, uning pozitsiyisi yighin ehlini ümidsizlendürgen idi.
Xéroshimadiki uchrishishqa nobél tinchliq mukapatigha érishken shexslerdin sabiq sowét ittipaqi prézidénti gorbachéf, sabiq chéx prézidénti waslaw xawél, tibet rohani dahisi dalay lama qatarliq 10 dek shexsning qatnishidighanliqi perez qilmaqta.