Özbékistanda parlamént saylimi bolup ötti

Yekshenbe küni özbékistanda parlamént saylimi ötküzülgen bolup, merkiziy asiya uchur torining özbékistan menbeliridin neqil élip körsitishiche, pütün memliket boyiche ötküzülgen saylamgha 53% saylighuchi qatniship, bélet tashlighan.
Muxbirimiz ümidwar
2009.12.27

Eslide saylamda 17 milyon ademning bélet tashlaydighanliqi tizimgha élin'ghan bolsimu, biraq, bu sanning hemmisi qatnashmighan. Özbékistan parlaméntining töwen palatasidiki 135 orun üchün 506 namzat saylamgha chüshken bolup, melum bolushiche bularning köpchiliki hökümetni qollaydighan partiyilerdin körsitilgen iken. Bu namzatlarni asasliqi özbékistan démokratik partiyisi" milliy tiklinish", özbékistan sotsiyal - démokratlar partiyisi "adalet", özbékistan erkin - démokratik partiyisi we özbékistan xelq - démokratik partiyisi qatarliqlardin kélip chiqqan namzatlar teshkil qilidiken.

Amérika awazining xewer qilishiche, özbékistanda téxi öktichi partiyiler tizimgha élinmighanliqi üchün ularning parlaméntta orun'gha ige bolushi mumkin emes iken.

Nöwette, özbékistan söz we metbu'at erkinliki éghir derijide chekliniwatqan dölet qatarida qaralmaqta, öktichilik pikirdiki kishilerni qolgha élish ishliri da'im bolup turmaqta, sabiq prézidént namzati muhemmed salih qatarliq bir türküm öktichiler hazirmu chet'ellerde öz pa'aliyetlirini dawamlashturmaqta.

Bu qétimqi saylam üstidin yawropa bixeterlik we hemkarliqi teshkilati, musteqil döletler hemdostluqining ijra'iye komitéti, shangxey hemkarliq teshkilati we islam konféransiyisi qatarliq xelq'araliq teshkilatlar hemde amérika qatarliq 36 döletning közetküchiliri mexsus közitish élip barghan. Saylam üchün özbékistan hökümiti 8 yérim milyon dollar chiqim qilghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.