Amérika tibetlerni özining pikrini özini köydürüshtin bashqa yollar arqiliq ipadileshke chaqirdi

Amérika tashqi ishlar ministirliqi bayanatchisi wéktoriye nuland muxbirlargha mundaq dédi: biz özini köydürüsh weqelirining dawamliq yüz bérishidin chongqur qayghuruwatimiz. Biz özini köydürüshni oylishiwatqan tibetlerning öz pikrini bashqa yaxshiraq yollar arqiliq ipadilishige chaqirimiz. Shuning bilen birge biz yene, da'im tekitlep kelgendek xitay hökümitini bu xil naraziliqni keltürüp chiqarghan tibet siyasitini közdin kechürüshke chaqirimiz.

Bu amérika dölet ishlar ministirliqining yéqinqi bir hepte ichide 2‏-qétim tibet mesilisini tilgha élishidur.

Wéktoriye nuland mezkur bayanatni élan qilishtin ikki kün awwal, népalda yashaydighan bir tibet muhajir özini köydürgen. 21 Yashlar chamisidiki bu tibetlik ölgen bolup, u 2009‏-yildin buyan özini köydürüp xitaygha naraziliq bildürgen tibetlerdin 101‏-kishi.

Xitay hökümiti tibetlerning özini köydürüsh heriketlirige bir tereptin perwa qilmighandek körünüp, yene bir tereptin qattiq bastursimu, lékin xelq'ara jem'iyetning dalay lama bilen söhbet ötküzüp, tibet mesilisini hel qilish heqqidiki küchlük bésimigha duch kelmekte.

Wéktoriye nuland ötken hepte bir qétim xitay hökümitini dalay lama bilen sözlishishke chaqirghan.