Gu'entanamodin qoyup bérilip palawgha orunlashturulghan Uyghurlardin 3 kishi awstraliyidin wiza telep qildi

Gu'entanamodin qoyup bérilip tinch okyandiki palawgha orunlashturulghan Uyghurlardin 3 kishi yéqinda awstraliyidin wiza telep qilghan.
Muxbirimiz erkin
2011.06.13

Awstraliye axbarat wasitilirining xewer qilishiche, palaw dölet ishlar ministiri wéktor yano Uyghurlardin 3 kishining wiza iltimasi awstraliyining fijidiki aliy komisarigha  tapshurulghanliqini bildürgen.

Wéktor yano “Ularning tézrek qayta orunlashturulushini ümid qilidighanliqi” ni tekitligen.

Palawdiki Uyghurlar 2009‏-yili mezkur döletke waqitliq orunlashturulghan bolup, bu yil 11-ay kelse ulargha 2 yil bolidu.

Lékin ularning palawda yene qanchilik yashaydighanliqi we awstraliyining qandaq jawab béridighanliqi melum emes. Yano wiktorning ashkarilishiche, awstraliye da'iriliri uninggha yuqiriqi Uyghurlarning wiza iltimasini körüp chiqishqa waqit kétidighanliqini éytqan.

Uning awstraliye bash elchisi suzan koksning sözini neqil keltürüshiche, ularning “Wiza iltimasi awstraliye bixeterlik tarmaqliridin ötidiken we buninggha 10 aydin bir yilghiche waqit kétidiken.”

Palaw amérikining waqitliq orunlashturush pilanini qobul qilip, güentanamodiki Uyghurlardin 6 kishini orunlashturghan idi. Palawgha bérishni ret qilghan Uyghurlardin qalghan 5 kishi nöwette güentanamodiki lagirda dawamliq tutup turulmaqta.

Ular amérika aliy sot mehkimisige erz sunup, özlirining amérika hökümiti teripidin aqlan'ghan bolsimu, lékin dawamliq tutup turulushigha naraziliq bildürgen idi. Biraq aliy sot mehkimisi bu yil 4‏-ayda qarar chiqirip, ularning erzini körüp chiqishni ret qilghan.

Wéktor yano, nöwette palawning ulargha xizmet tépip bérishke tirishiwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.