Қазақистанлиқлар хитайға йәр иҗарә беришкә қарши намайиш өткүзди

1 - Айниң 30 - күни қазақистанниң алмута шәһиридә қазақистан һөкүмитиниң хитайға кәң көләмдә йәр иҗарә бериш мәсилиси һәққидә қаршилиқ намайиши өткүзүлди.
Мухбиримиз үмидвар
2010-01-31
Елхәт
Пикир
Share
Принт

Б б с агентлиқиниң бу һәқтики хәвиридә ейтилишичә, намайишчилар қоллирида "қазақниң йери сетилмайду" дегән лозункиларни көтүргән болуп, тәхминән 1000 әтрапида намайишчи алмута шәһиридики чоң бағчидики ленинниң һәйкили йениға топланған.

Өктичи партийә рәһбәрлири нөвәт билән сөзгә чиқип, қазақистан рәһбәрлирини хитайға йәр иҗарә бәрмәсликкә чақирған шуниңдәк хитайниң қазақистанға тәһдит пәйда қиливатқанлиқини әйиблигән.

Хитайға йәр иҗарә бериш мәсилиси өткән йили 12 - айда мәйданға чиққан болуп, астана рәһбәрлири хитайниң қазақистандин бир милйон гектар йәрни деһқанчилиқ қилиш үчүн иҗарә беришкә тәләп қилғанлиқини ашкарилиғандин кейин бу хәвәр тездин тарқилип, җәмийәттә күчлүк ғулғула пәйда қилған иди.

Пәрғанә агентлиқиниң йезишичә, президент нурсултан назарбайев вә баш министир кәрим мәсүмов қазақистанниң туприқиниң хитайға берилмәйдиғанлиқини җакарлиған болсиму, бирақ таки һазирғичә өктичиләр арисида инкаслар давамлашмақта иди. Қазақистан өктичилириниң тәнқид қилишичә, хитай нөвәттә, қазақистанниң нефит, тәбиий газ қатарлиқ байлиқлириға мәбләғ селип вә бәзи енергийә ширкәтлириниң пай чәклирини сетивелип, бу җайда үстүнлүккә игә болушқа башлиған. Бу әһвал қазақлар арисида тәһдит туйғусини ашурмақта икән.

Өткән йили хитай - қазақистан рәһбәрлири, хитайниң қазақистанға 10 милярд доллар қәрз берип турушқа пүтүшкән иди.

Ройтерс агентлиқиниң хәвәр қилишичә, намайишни уюштурғучи өктичи партийә "азат"ниң рәһбири болат абилов "улар хитайдин 13 милярд қәрз алди, әмди улар бизниң тупрақлиримиз билән бу қәрзни қайтурмақчи болуватиду" дегән. Намайишчилар "қазақистан земинида хитайниң пурчақлириға орун йоқ" дегәндәк шоарларни товлиған.

Бу қазақларниң мустәқил болғандин кейинки тунҗи қетимлиқ кәң көләмлик хитайға қарши наразилиқ намайиши болуп һесаблинидикән. Қазақистан сақчи даирилириму бу намайишқа рухсәт қилған болуп, илгири улар өктичилик намайишиға йол қоймиған. Буниңдин илгири хитайға қарши намайишлар алмутида уйғурлар тәрипидин өткүзүлгән болса, бу нөвәт қазақлар өзлири мәйданға чиққан.

Пикирләр (0)
Share
Толуқ бәт