قازاقىستان ھۆكۈمىتى پارلامېنتى بىلەت تاشلاپ، كىرىمى مەسىموف ھۆكۈمىتىگە ئىشەنچ ئاۋازى بەردى

ئالمائاتالىق يەرلىك ئۇيغۇرلاردىن بولغان مەسىموفنىڭ ئېتنىك كېلىپ چىقىشى قازاقىستان رادىكال ئۆكتىچى گۇرۇھلار تەرىپىدىن ئىزچىل تالاش-تارتىش قىلىنىدىغان مەسىلە بولۇپ كەلگەن ئىدى. ۋەزىيەتتىن خەۋەردار كىشىلەرنىڭ ئىلگىرى سۈرۈشىچە، ئۇ ئىلگىرى رادىكال ئۆكتىچى گۇرۇھلارنىڭ پىكرىنى بېسىقتۇرۇشنى كۆزلەپ، ئۆزىنىڭ قازاق ئىكەنلىكىنى ئېلان قىلغان.

قازاقىستان ئاساسى قانۇنىدا سايلامدىن كېيىن، ھۆكۈمەت چوقۇم يېڭى پارلامېنتنىڭ ماقۇللۇقىدىن ئۆتۈشى كېرەك. قازاقىستاندا 16-يانۋار پارلامېنت سايلىمى ئېلىپ بېرىلىپ، پرېزىدېنت نۇرسۇلتان نەزەربايۇفنىڭ «نۇر ئوتۇن» پارتىيىسى پارلامېنت خەلق مەجلىسىدىكى 107 ئورۇنسدىن 83 ئورۇننى ئىگىللىگەن ئىدى.

قالغان 24 ئورۇننى نەزەربايېفقا يېقىنلىقى بىلەن تونۇلغان «ئاق يول» پارتىيىسى بىلەن قازاقىستان كوممۇنىستىك خەلق پارتىيىسى ئىگىللىگەن. 16-يانۋاردىكى سايلام خەلقئارا كۆزەتكۈچىلەرنىڭ تەنقىدىگە ئۇچرىغان ئىدى. سايلامغا كۆزەتكۈچىلىك قىلغان ياۋروپا بىخەتەرلىك ھەمكارلىق تەشكىلاتى سايلامنىڭ دېموكراتىك بولمىغانلىقىنى ئىلگىرى سۈرۈپ، ھۆكۈمەتنىڭ ھەقىقىي ئۆكتىچى پارتىيە-گۇرۇھلارغا توسالغۇلۇق قىلغانلىقىنى بىلدۈرگەن.