Qeshqer pidagogika inistituti üch neper éghir ayagh mu'ellimni öz ichige alghan 15 neper Uyghur oqutquchini ishtin qoghliwetti

Éniq melumatqa qarighanda, qeshqer pidagogika inistituti partkomi bu yil mexsus höjjet chüshürüp 15 Uyghur oqutquchini sinaq mezgilide layaqetsiz bahalandi dégen bahane bilen ishtin boshatqan bolup, ishtin boshitilghan bu oqutquchilar ichide aynur memtimin, bu'ayshem abdulla, hemragül hémit qatarliq üch oqutquchi ishtin boshitilghanda éghir ayaq bolup, ular xitay ölkiliridiki dangliq uniwérsitétlarni püttürüp mezkür mektepte oqutquchiliq qiliwatqan iken.

Ishtin boshitilghan oqutquchilar qeshqer pidagogika inistitutigha üch yilliq emgek toxtami bilen kelgen oqutquchilar bolup hemmisi aliy mektep toluq kursidin yuqiri melumatlargha ige iken. Eksiche, bu mektepke élin'ghan aliy téxnikom, özlikidin oqush we baklawérliq oqush tarixigha ige xitay oqutquchilarning sinaq mudditi uzartilghan.

Xitayning emgek qanunida sinaq mudditi eng uzaq bolghanda bir yildin éship ketmeslik, ayal ishchi ‏ - xizmetchiler éghir ayagh mezgilide, bala émitiwatqan mezgilide ishtin boshitishqa bolmaydu dep belgilen'gen.

Qeshqer pidagogika inistituti partkomining qanunnimu közge ilmay Uyghur oqutquchilarni ishtin qoghlighanliqidek qilmishi oqutquchilarda naraziliq peyda qilghan bolsimu, emma qeshqerning munasiwetlik ma'arip we hökümet tarmaqliri ishtin boshitilghan oqutquchilarning menpe'etini qoghdimay, qeshqer pidagogika inistitut partkomining qanunsiz qilmishigha yol qoyghan iken.