Qirghizistan prézidénti 'öktichi zhurnalist génadi pawlyukning öltürülüsh weqeside qoli bar' dep eyiblendi

Génadi pawlyuk 16 - dékabir küni xizmet munasiwiti bilen qazaqistan'gha kélip, alma - atadiki bir méhmanxanidin bir éghizlik yataqxanini ijarige alghan. Shu küni pawlyuk bir kishining hemrahliqida méhmanxanidin chiqip kétip, bir a'ililikler binasining 6 - qewitidin put - qoli baghlan'ghan péti yerge tashliwétilgen halda bayqalghan. U doxturxanida bir qanche kün hushsiz yatqandin kéyin seyshenbe küni ölgen.

Qirghizistandiki öktichi partiye - guruhlar we shexsler bu weqede baqiyéfning qoli barliqini ilgiri sürmekte. Lékin, prézidéntning bayanatchisi baqiyéfning bu weqe bilen alaqisi barliqini ret qilghan. Prézidént baqiyéf 2005 ‏ - yili hakimiyet sorighandin buyan uning bashqurush usuli qopallishipla qalmay, belki öktichi rehberler we jurnalistlargha süyqest hem hujum qilish ehwali köpeygen idi.

Pawlyuk ilgiri "komsomolskaya prawda" gézitining bash muherrirlik wezipisini ötigen. U ötken yili öktichiler rehbiri ömerbek tekebayéf bilen yéqinliship, baqiyéfni tenqidleshni kücheytken idi.

Tekebayéf bolsa pawlyukning qirghizistan hökümitining buyruqi bilen öltürülgenlikini bildürgen. Lékin baqiyéfning bayanatchisi almaz turdumemedof, qatillarni adaletning jazasigha tartishni telep qilip, " tekshürgüchiler buninggha kim jawapkar bolsa choqum tépip chiqishi kérek" dégen.