Қирғиз - өзбек чегрисидики оқ чиқиришта бир нәпәр қирғизстанлиқ өлтүрүлгән

“азадлиқ” радиосиниң хәвәр қилишичә, 4 - январ күни қирғизистан - өзбекистан чегрисида өзбекистан чегра қоғдиғучилириниң қирғизистан пуқралириға қорал ишлитиши нәтиҗисидә бир адәм өлтүрүлгән.
Мухбиримиз үмидвар
2013.01.06
Share on WhatsApp
Share on WhatsApp


Хәвәрдә ейтилишичә, өзбекистан чегра қоғдиғучи әтрити әткәсчилик қилиш үчүн, чегридин қанунсиз өткән қирғизистан пуқрасиға оқ чиқирип, уни өлтүргән һәмдә шу күни кәчтә җәсәт өлгүчиниң қирғизистан тәрәптики туғқанлириға тапшуруп берилип, уларниң һечқандақ әрзи - дәваси йоқлуқи һәққидә хәт елинған. Бирақ, қирғизистан тәрәп бу вәқәни өзбекистан тәрәп билән бирликтә тәкшүридиғанлиқини билдүргән.

Әмма, қирғизистан дөләт чегра идариси бу мунасивәт билән баянат елан қилип, өзбекистан тәрәпниң мундақ қирғизистан пуқралириға оқ чиқириш вәқәлириниң тунҗи қетим әмәсликини билдүргән. Өзбекистан чегра қоғдиғучилири мундақ оқ чиқиришни амалсизлиқтин өзлириниң һаят бихәтәрлики үчүн қилғанлиқини чүшәндүргән.

Бу хилдики вәқәләр илгири қазақистан - өзбекистан чегралиридиму йүз бәргән иди.

Һазир қирғизистан вә өзбекистан чегра қоғдиғучилири икки дөләт чегрисини қаттиқ қоғдаш түзүми орнатқан болуп, ош вә җалал - абад вилайәтлиригә созулған өзбекистан - қирғизистан чегриси сабиқ совет иттипақи дәвридә пүтүнләй очуқ иди. Бир аилә кишилири вә уруғ - туғқанлар чегриниң һәр иккила тәрипигә орунлашқан болуп, улар арисини пәқәт нами бар, һечқандақ тосақсиз җумһурийәт чегрилири айрип туратти. Бирақ, мустәқиллиқтин кейин вәзийәт өзгәрди.

2010 - Йили ош вә җалал абад районида йүз бәргән өзбек - қирғиз тоқунушида 100 миң өзбек өзбекистан тәвәсигә қечип кәткән болсиму, лекин кейин уларниң һәммиси өз вәтинигә қайтурулған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.