فرانسىيە ئاگېنتلىقىنىڭ خەۋەر قىلىشىچە، روزا ئوتۇنبايېۋا بۈگۈن ئېلان قىلغان قارارنامىسىدا ھۆكۈمەتتىن سايلامدىن ئاۋالقى بىخەتەرلىك خىزمەتلىرىنى ياخشى ئىشلەشنى تەلەپ قىلغان. قىرغىز ۋاقىتلىق ھۆكۈمىتى بۇ يىل 6 - ئايدا ئاساسىي قانۇنىدا ئىسلاھات ئېلىپ بېرىپ، پارلامېنتقا تېخىمۇ كەڭ ھوقۇق بېرىدىغان بىر ئاساسىي قانۇننى ماقۇللىغان ئىدى.
قىرغىزىستان 4 - ئايدا سابىق پرېزىدېنت قۇرمانبېك باقىيېف ئاغدۇرۇلغاندىن بېرى پارلامېنتسىز تۇرماقتا. ئۇنىڭ ئۈستىگە دۆلەتتە ئارقا - ئارقىلاپ مەيدانغا كەلگەن توقۇنۇشلاردا 350 تىن ئارتۇق كىشى ئۆلۈپ، 400 مىڭدىن ئارتۇق كىشى ئۆي - ماكانلىرىدىن ئايرىلغان ئىدى.
قىرغىزىستاندىكى توقۇنۇشلارنىڭ ئايىغى ھېلىھەم تەلتۆكۈس ئۈزۈلمەي كەلمەكتە. قىرغىزىستان دۇنيادا ئامېرىكا ۋە رۇسىيىنىڭ ھەربىي بازىلىرى تەڭ مەۋجۇت بولغان دۆلەت بولۇپ، ئۇنىڭ مۇقىملىقى رايون ئۈچۈن مۇھىم دەپ قارالماقتا.