Русийә чәтәл аптомобиллириниң чегра беҗини өстүрмәкчи

Русийә баш министири владимир путин җүмә күни буниңдин кейин чәтәләрдин импорт қилидиған аптомобилларни азайтиш вә чегра беҗини ашуруш арқилиқ русийиниң өзиниң аптомобил санаитини раваҗландуруш һәм бу усул билән русийиниң әслидики сабиқ совет иттипақи дәвридин тартип давамлишип келиватқан аптомобил санаитини вәйран болуш хәвпидин қутулдуруш лазимлиқини тәкитлигәндин кейин русийиниң бир қисим аптомобил содиси билән шуғуллинидиған порт шәһәрлиридики пуқралар вә тиҗарәтчиләр наразилиқ һәрикәтлири елип барған.
Мухбиримиз үмидвар
2008-12-21
Share

"Нәвсру" ториниң хәвәр қилишичә, шәнбә күни тинч окян бойидики әң чоң импорт вә екиспорт билән шуғуллинидиған порт шәһәр владивостокта бир қанчә йүз адәм путинниң бу сияситигә қарши наразилиқ намайиши елип барған болуп, нәтиҗидә сақчилар билән намайишчилар арисида тоқунуш келип чиқип, аз дегәндәк бир қанчә он адәм қолға елинған.

Владивосток русийиниң тинч окян бойидики һәрбий - иқтисадий вә сода әһмийити интайин муһим порт шәһәр. Бу йәр йәнә тинч окян дөләтлиридин импорт қилинидиған аптомобилларниң киргүзүлидиған биринчи өткили болуп, шәһәрдики 200 миңдин артуқ адәм бу саһәгә мунасивәтлик иш орни билән турмуш кәчүриду.

Асаслиқи японийә машинилири мәзкур шәһәр арқилиқ русийә вә башқа мустәқил дөләтләр һәмдостлуқи әллиригә тарқилиду. Совет иттипақи йимирилгәндин кейин русийиликләрдә чәтәл машинилири, болупму бензин сәрпияти аз һесаблинидиған япон машинилирини һәйдәш көпәйгән болуп, япон аптомобиллири мустәқил дөләтләр һәмдостлуқи хәлқлири җүмлидин русийиликләрниң яхши көрүшигә еришкән.

Аптомобил содигәрлири вә бу саһәдә җан беқиватқан кишиләр чегра беҗиниң еғирлишип кетишиниң уларниң тиҗаритигила әмәс, бәлки көплигән адәмләрниң турмушиға қийинчилиқларни кәлтүрүп чиқиридиғанлиқини билдүрүшкән. Наразилиқ һәрикәтлири йәкшәнбә күнигичә русийиниң бир қанчә җайлириға кеңәйгән болуп, владивостоктики намайишлар әң чоң болуп һесаблиниду.
 

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт