Rusiye chet'el aptomobillirining chégra béjini östürmekchi

Rusiye bash ministiri wladimir putin jüme küni buningdin kéyin chet'elerdin import qilidighan aptomobillarni azaytish we chégra béjini ashurush arqiliq rusiyining özining aptomobil sana'itini rawajlandurush hem bu usul bilen rusiyining eslidiki sabiq sowét ittipaqi dewridin tartip dawamliship kéliwatqan aptomobil sana'itini weyran bolush xewpidin qutuldurush lazimliqini tekitligendin kéyin rusiyining bir qisim aptomobil sodisi bilen shughullinidighan port sheherliridiki puqralar we tijaretchiler naraziliq heriketliri élip barghan.
Muxbirimiz ümidwar
2008.12.21

"Newsru" torining xewer qilishiche, shenbe küni tinch okyan boyidiki eng chong import we ékisport bilen shughullinidighan port sheher wladiwostokta bir qanche yüz adem putinning bu siyasitige qarshi naraziliq namayishi élip barghan bolup, netijide saqchilar bilen namayishchilar arisida toqunush kélip chiqip, az dégendek bir qanche on adem qolgha élin'ghan.

Wladiwostok rusiyining tinch okyan boyidiki herbiy - iqtisadiy we soda ehmiyiti intayin muhim port sheher. Bu yer yene tinch okyan döletliridin import qilinidighan aptomobillarning kirgüzülidighan birinchi ötkili bolup, sheherdiki 200 mingdin artuq adem bu sahege munasiwetlik ish orni bilen turmush kechüridu.

Asasliqi yaponiye mashiniliri mezkur sheher arqiliq rusiye we bashqa musteqil döletler hemdostluqi ellirige tarqilidu. Sowét ittipaqi yimirilgendin kéyin rusiyiliklerde chet'el mashiniliri, bolupmu bénzin serpiyati az hésablinidighan yapon mashinilirini heydesh köpeygen bolup, yapon aptomobilliri musteqil döletler hemdostluqi xelqliri jümlidin rusiyiliklerning yaxshi körüshige érishken.

Aptomobil sodigerliri we bu sahede jan béqiwatqan kishiler chégra béjining éghirliship kétishining ularning tijaritigila emes, belki köpligen ademlerning turmushigha qiyinchiliqlarni keltürüp chiqiridighanliqini bildürüshken. Naraziliq heriketliri yekshenbe künigiche rusiyining bir qanche jaylirigha kéngeygen bolup, wladiwostoktiki namayishlar eng chong bolup hésablinidu.
 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.