خىتاي ھۆكۈمىتىگە تەۋە شىنخۇا ئاگېنتلىقىنىڭ بىلدۈرۈشىچە، خېبېي ئۆلكىسى، شىجۇئاجۇئاڭ شەھىرىدىكى ئوتتۇرا خەلق سوت مەھكىمىسى، سەنلۇ گۇرۇھىنىڭ 12 - ئايدا سوت مەھكىمىسىگە سۇنغان " شىركەتنىڭ ۋەيران بولۇش تۈپەيلى ئىش توختىتىش " ئىلتىماسىنى قوبۇل قىلغان.
خىتايدىكى 22 شىركەت تەرىپىدىن بازارغا سېلىنغان سۈت پاراشوكىدا زەھەرلىك مېلامىن ماددىسى بايقالغان بولۇپ، زەھەرلىك سۈت پاراشوكىنى ئىستىمال قىلغان 300 بوۋاق كېسەلگە گىرىپتار بولغاندىن سىرت، ئاز دېگەندە 6 بوۋاق بۇ تۈپەيلى ھاياتىدىن ئايرىلغان ئىدى.
سەنلۇ گۇرۇھىنىڭ باش دېرىكتورى تىيەن ۋېنخۇئا باش جىنايەتچىلەرنىڭ بىرى سۈپىتىدە مۇددەتسىز قاماق جازاسىغا، شىركەتنىڭ يەنە 6 خادىمى ئايرىم - ئايرىم 5 يىلدىن 15 يىلغىچە بولغان قاماق جازاسىغا ھۆكۈم قىلىندى.
خىتايدا ئىشلەپچىقىرىلغان دورا ۋە - يېمەكلىكلەردە بايقالغان زەھەرلىك ماددىلار سەۋەبلىك مەيدانغا كەلگەن ھادىسىلەر، كىشىلەردە خىتاينىڭ مەھسۇلاتلىرىغا بولغان ئىشەنچنى يوقىتىش بىلەن بىرگە، خىتاي ئىقتىسادىنىڭ چۆكۈشىدىكى تۈپ ئامىللارنىڭ بىرىگە ئايلانماقتا.