شاڭخەي ھەمكارلىق تەشكىلاتىغا ئەزا دۆلەتلەرنىڭ كىنو فېستىۋالى ئىسسىق كۆلدە باشلاندى

19 - ئۆكتەبىر كۈنى قىرغىزىستاننىڭ پايتەختى بىشكەكتە شاڭخەي ھەمكارلىقىغا ئەزا دۆلەتلەرنىڭ 2 - قېتىملىق كىنو فېستىۋالى باشلاندى.
 
پەرغانە ئاگېنتلىقىنىڭ خەۋەر قىلىشىچە، مەزكۇر فېستىۋالغا قىرغىزىستان، قازاقىستان، ئۆزبېكىستان، تاجىكىستان، رۇسىيە ۋە خىتاينىڭ 100 دىن ئارتۇق كىنو فىلىمى تەۋسىيە قىلىنغان بولۇپ، بۇنىڭ ئىچىدە 38 فىلىم تاللىنىپ رەسمىي فېستىۋالغا قاتناشتۇرۇلىدىكەن.

بۇ قېتىمقى فېستىۋال مەرھۇم قىرغىز يازغۇچىسى چىڭگىز ئايتماتوفقا بېغىشلانغان بولۇپ، ئۇنىڭ "خەير - خوش گۈلسارە" ناملىق ئەسىرى ئاساسىدىكى كىنو فىلىمى باشلىنىش مۇراسىمىدا قويۇلغان.
 
شاڭخەي ھەمكارلىقىنىڭ كىنو فېستىۋالى ئاساسلىقى ئىسسىق كۆل بويىدىكى گۈزەل شەھەر چولپان - ئاتادا ئۆتكۈزۈلگەندىن سىرت يەنە بىر قىسىم فىلىملەر قىرغىزىستاننىڭ باشقا شەھەرلىرىدىكى كىنوخانىلاردىمۇ قويۇلىدىكەن. فېستىۋال 26 - ئۆكتەبىر كۈنى تاماملىنىدۇ.