7 - Түркүм хитай кадирлири шенҗендин қәшқәргә қарап йолға чиқиш алдида турмақта

Шенҗен иқтисадий алаһидә районидин 26 нәпәр кадир уйғур райониға әвәтилмәкчи. Җәнубий шәһәр гезитиниң бу һәқтики хәвиридин мәлум болушичә, бу 26 киши қәшқәрдики партийә вә һөкүмәт органлиридин дохтурханиларғичә болған муһим орунларда вәзипигә тәйинлинидикән.
Мухбиримиз ирадә
2010.11.04

Хитай даирилири бейҗиңда чақирған "шинҗаң хизмити" йиғинидин кейин уйғур елигә ярдәм қилиш нами астида уйғур районидики һәрқайси вилайәтләрни 19 ичкири хитай өлкисигә тәқсим қилип бәргән. Қәшқәр вилайити хитайниң шенҗен алаһидә райониниң ярдәм көрситиш нишани сүпитидә шенҗенға берилгән иди.

Хәвәрдин мәлум болушичә, шенҗендин келидиған 26 нәпәр хитай кадирниң 6 нәпири партийә вә һөкүмәт кадири болуп, улар үч йиллиқ муддәт бойичә қәшқәр шәһәрлик парткомниң муавин секретарилиқ вә қәшқәр шәһәрлик партком тәшкилат бөлүми, қәшқәр шәһәрлик малийә идариси һәмдә қәшқәр шәһәрлик маарип идариси қатарлиқ органларниң муавин башлиқилиқ вәзипилирини зиммисигә алидикән.

Хәвәрдә, башқа 20 нәпәр кишиниң техника хадими икәнлики, уларниң һәрқайси дохтурхана вә мәктәпләрдә хизмәт қилидиғанлиқи илгири сүрүлгән.

5 - Июл үрүмчи вәқәсидин кейин хитай даирилири түрлүк намлар астида уйғур райониға хитай көчмәнлирини йәрләштүрүш хизмитини чиң тутуп елип бармақта. Гәрчә хитай даирилири буни уйғур райониниң иқтисадиға ярдәм бериш дәватқан болсиму, әмма уйғур көзәткүчилири буниң уйғур райониға көчмән йөткәшниң йеңи бир баһаниси икәнликини билдүрүшмәктә.

Мәлум болушичә, бу шенҗендин қәшқәргә келидиған 7 - түркүм хадимлар икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.