Суданда гөрүгә тутулған хитай ишчилардин йәнә бири тепилди

Хитайниң судандики әлчиханиси "һаят" тепилған ишчини судан даирилириниң тапқанлиқи шундақла өзлиригә тапшуруп бәргәнликини, ишчида оқ йегәнлик, яриланғанлиқниң аламити байқалмиғанлиқини билдүргән.

Қораллиқ кишиләр 18 ‏ - өктәбир күни суданниң җәнубий кордуфан өлкисидики нефит қудуқида мәшғулат елип бериватқан хитай дөләтлик нефит ширкитиниң 9 нәпәр' ишчисини гөрүгә елип, хитай даирилиридин судандики хитай ширкәтлирини елип чиқип кетишни тәләп қилған иди.

Хитай һөкүмитиниң әскәртишичә, судан даирилири елип барған гөрүдикиләрни қутқузуш һәрикитидә 4 нәпәр хитай өлгән, 3 хитай ишчи қутқузувелинған болсиму, лекин яриланған иди. Бу қетим из дерикини алалмиған икки кишидин бири тепилди, лекин һаят - маматлиқи мәлум болмиған йәнә бириниң из - дерики қилинмақта.

Хитайниң судандики әлчиханиси ахирқи хитай ишчиниң из - дерикини қиливатқанлиқи, судан һөкүмити билән һәмкарлишиватқанлиқини билдүргән. Гөрүгә елиш вәқәсидин кейин судан һөкүмити дарфур партизанлар әтрити - адаләт вә баравәрлик һәрикитини вәқәгә җавабкар болуши керәк, дәп әйиблигән, лекин мәзкур тәшкилат гөрүгә елиш вәқәси билән алақиси барлиқини рәт қилған иди.

Хитай узундин бери судан һөкүмити билән һәмкарлишип, судан даирилириниң дарфурдики йәрлик хәлқләргә қаратқан қирғинчилиқиға һәмшерик болуш билән әйибләнгән шундақла хитай б д т хәвпсизлик кеңишидә америкиниң дарфурға хәлқара қошун киргүзүш тәклипигә қарши чиққан.

Б б с ниң бу һәқтики бир программисида хитайниң б д т хәвпсизлик кеңишиниң ембарго қарариға қаримай, суданға еғир типлиқ қоралларни сатқанлиқи илгири сүрүлгән иди.