Xitayda süt parashokida zeherlen'gen we ölgenlerge bir milyard bir yüz milyon yüen tölem bérilmekchi

Xitayda mélamin qoshulghan süt parashoklirini ishlepchiqirip xitayda alte bowaqning ölüshini, yene üch yüz mingdin artuq bowaqning oxshimighan derijide zexmilinishini keltürüp chiqarghan weqege chétishliq senlu markiliq süt parashoki guruhini öz ichige alghan 22 karxana ‏ - zawutning, zeherlen'gen bowaqlargha deslepki qedemde bir milyard bir yüz milyon yüen tölem tölishi békitilgen.
Muxbirimiz gülchéhre
2008.12.30

Xitay sehiye ministirliki, bu mes'ul karxanilar, zeherlik süt parashokliridin zeherlinip ölgen bowaqlar a'ilisige 200 ming yüen, éghir késellerge 30 ming yüen we adettiki késel bolghan bowaqlargha ikki ming yüendin tölem bérishi hemde ularning 18 yashqiche bolghan munasiwetlik dawalinish heqqini kötürüshi kérek dep belgiligen.

Bu belgilime buyiche tölem tölesh 2009 - yili 1 - yanwardin bashlap yürüshleshtürülidiken. Hazirghiche xitayda zeherlik süt parashoklirini istimal qilghanliq sewebidin börikide tash peyda bolghan bowaqlar 300 mingdin ashidu, ötken ay Uyghur aptonom rayonluq méditsina uniwérsitéti birinchi doxturxanisida börektin tash chüshürüsh opératsiyisi qilin'ghan yette yérim ayliq bowaq mujahid, senlu markiliq bowaqlar süt parashokini ichip börikide tash peyda bolghan hemde eng kichik tash chüshürüsh opératsiyisi qilin'ghan bowaq hésablinidu.

Xitay saqchi da'iriliri hazirgha qeder zeherlik süt parashokigha chétishliq 74 ademni tutup turmaqta, bularning 32 si resmiy qolgha élin'ghan. 26 ‏ - Dékabirdin tartip bügün'ge qeder xébé ölkisi shijaju'ang sheherlik ottura sotta, senlu zeherlik süt parashoki weqesige da'ir yeni mélamin qoshulghan süt parashokining ishlepchiqirilishi, sétilishi, tarqitilishigha mes'ul bolghan asasliq jinayet gumandarliridin 17 si üstidin sot échilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.