Таҗикистан хитайға 1000 квадрат километир йәр бәрди

Хитай билән узундин бери чегра-талаш тартиши болған таҗикистан хитайниң тәлипигә бинаән өз территорийисидики миң квадрат километир келидиған земинни хитайға өткүзүп бәрди.
Мухбиримиз ирадә
2011-01-13
Share

Мәзкур қарар чаршәнбә күни чүштин кейин таҗикистан парламенти тәрипидин рәсмий мақулланған. Хитай ташқи ишлар баянатчиси хоң лей бу хәвәрни дәлиллигән.

Бирләшмә агентлиқиниң хәвәр қилишичә, таҗикистан билән хитай арисидики бу чегра талаш-тартиши таҗикистанға сабиқ совет иттипақи мәзгилидин қалған болуп, хитай памир егизликиниң сабиқ совет иттипақиниң чеграси ичидә болған қисмидин 28 миң квадрат километир йәрниң хитайға тәвә икәнликини илгири сүрүп кәлгән. Бу мәсилә һәққидә сабиқ совет иттипақи билән хитай арисида көп қетим сөһбәтләр болған.

Хитай даирилири таҗикистан мустәқил болған 90- йиллардин тартип таҗикистандин бу земинни тәләп қилған болуп, таҗикистан президенти емам ели рахман 2002- йили 5- айда хитайға елип барған рәсмий зиярити җәрянида хитай тәләп қиливатқан памир егизликидики бу җайниң үч йерим пирсәнтини хитайға беришкә қошулған. Әмма қарар техи таҗикистан парламенти тәрипидин мақулланмиған иди.

Таҗикистанниң хитайға земин өткүзүп бериш қарари рәсмий елан қилинғандин кейин, бу хәвәр таҗикистанда зор ғулғула пәйда қилди. Таҗикистандики өктичиләрниң рәһбири муһиддин қәбири хитайға йәр беришниң асасий қанунға хилап қилмиш икәнликини билдүрүп, "бу таҗикистан дипломатийисидики бир мәғлубийәт "дәп көрсәтти.

Һазир хитайға өткүзүп берилгән 1000 квадрат километирлиқ йәргә аит тәпсилий мәлуматлар техи толуқ әмәс. Бу районда қанчилик олтурақ аһалиниң барлиқи, уларниң қандақ болидиғанлиқи һәққидә таҗик-хитай һәр иккила тәрәп техи ениқ ипадә билдүрмиди.

Таҗикистан хитайға өткүзүп бәргән йәр уйғур аптоном райони территорийиси тәвәсигә мәнсуп болиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт