Tajikistan xitaygha 1000 kwadrat kilométir yer berdi

Mezkur qarar charshenbe küni chüshtin kéyin tajikistan parlaménti teripidin resmiy maqullan'ghan. Xitay tashqi ishlar bayanatchisi xong léy bu xewerni delilligen.

Birleshme agéntliqining xewer qilishiche, tajikistan bilen xitay arisidiki bu chégra talash-tartishi tajikistan'gha sabiq sowét ittipaqi mezgilidin qalghan bolup, xitay pamir égizlikining sabiq sowét ittipaqining chégrasi ichide bolghan qismidin 28 ming kwadrat kilométir yerning xitaygha tewe ikenlikini ilgiri sürüp kelgen. Bu mesile heqqide sabiq sowét ittipaqi bilen xitay arisida köp qétim söhbetler bolghan.

Xitay da'iriliri tajikistan musteqil bolghan 90- yillardin tartip tajikistandin bu zéminni telep qilghan bolup, tajikistan prézidénti émam éli raxman 2002- yili 5- ayda xitaygha élip barghan resmiy ziyariti jeryanida xitay telep qiliwatqan pamir égizlikidiki bu jayning üch yérim pirsentini xitaygha bérishke qoshulghan. Emma qarar téxi tajikistan parlaménti teripidin maqullanmighan idi.

Tajikistanning xitaygha zémin ötküzüp bérish qarari resmiy élan qilin'ghandin kéyin, bu xewer tajikistanda zor ghulghula peyda qildi. Tajikistandiki öktichilerning rehbiri muhiddin qebiri xitaygha yer bérishning asasiy qanun'gha xilap qilmish ikenlikini bildürüp, "bu tajikistan diplomatiyisidiki bir meghlubiyet "dep körsetti.

Hazir xitaygha ötküzüp bérilgen 1000 kwadrat kilométirliq yerge a'it tepsiliy melumatlar téxi toluq emes. Bu rayonda qanchilik olturaq ahalining barliqi, ularning qandaq bolidighanliqi heqqide tajik-xitay her ikkila terep téxi éniq ipade bildürmidi.

Tajikistan xitaygha ötküzüp bergen yer Uyghur aptonom rayoni térritoriyisi tewesige mensup bolidu.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar