Тарим дәрясиниң төвән еқинлирини су билән тәминләш тохтайду

Хитай ахбаратлирида көрситилишичә, тарим дәря башқуруш идариси тарим дәрясида көрүнгән су миқдари төвәнләш сәвәбидин, ишләпчиқиришни су билән тәминләшни капаләткә игә қилиш үчүн, тарим дәрясиниң төвән еқинлирини су билән тәминләшни тохтитидикән.
Мухбиримиз җүмә
2008.11.03

Шинхуаниң ахбаратида көрситилишичә, бу йил тарим дәрясида су миқдари йиллардикигә нисбәтән бир қәдәр төвәнлигән болуп, нәтиҗидә 2007 - йили өктәбирдин буян тарим дәрясиниң төвән еқинлирида уда йәттә ай су үзүлүп қалған.

Хәвәрдә тарим дәрясиниң төвәнки еқинлириға су йетишмәслик һадисиси асасән, тарим дәря вадиси вә дәряни су билән тәминләйдиған тармақ дәря вадилирида көпләп йәр ечиш вә пилансиз су ишлитиштин пәйда болған дәп көрситилгән.

Тарим дәряси уйғур елидики җүмлидин дунядики әң узун ички қуруқлуқ дәряларниң бири болуп, омумий узунлуқи 1321 километир. Ашкарилинишичә, тарим дәрясиниң төвәнки еқинидики 320 километир бөликигә 30 йилдин бери су берип бақмиған болуп, нәтиҗидә дәря вадисидики тәбиий йешил каридор вә нәччә он миң гектар тоғрақлиқ бара - бара қуруп вәйран болған.

Мәлум болушичә, тарим дәряси төвәнки еқимидики екологийиниң бузулуши чаң тозан йеғиш вә тупрақниң қумлишиши қатарлиқ ақивәтләрни кәлтүрүп чиқиришқа башлиғандин кейин хитай һөкүмити 2001 - йилидин буян, дәря екологийисини қутқузушқа мәбләғ аҗритип, дәряниң төвән еқинлирини су билән тәминләшни әслигә кәлтүргән һәмдә һазирғичә 9 қетим су бәргән икән.



Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.