Тәйвәнниң гавшйоң шәһири рабийә ханим һәққидики филимни қоюшни қайта ойлишидиғанлиқини елан қилди

Франсийә агентлиқиниң хәвәр қилишичә, тибәт роһани даһиси далай ламаниң гавшйоңда елип барған йеқинқи зияритидин кейин, хитайниң гавшйоңға саяһәт қилишни байқут қилғанлиқиға даир хәвәрләр гавшйоңниң саяһәт вә сияси сәһнисидики затларни әндишигә салған.

Гавшйоң меһманханилар җәмийити йәрлик даириләрни рабийә қадир ханим һәққидики "муһәббәтниң 10 шәрти" дегән филимни қоюштин ваз кечишкә чақирған. Гавшйоң шәһәрлик һөкүмәтниң баянатчиси чаң җяшиң "бизниң бу филимни қоюш пиланимиз бар, лекин биз һазир қоюш ‏ - қоймаслиқни қайта көздин көчүрүватимиз," дегән.

Тәйвәндики "җуңго вақти гезити" хитай һөкүмитиниң чоң қуруқлуқтики саяһәт ширкәтлиригә йолйоруқ берип, гавшйоң шәһиригә саяһәтчи апармаслиқни агаһландурғанлиқини, гавшйоңдики меһманханиларға берилгән ятақхана закаслириниң бикар қилинғанлиқини билдүргән.

Лекин тәйвән димократийә тәрәққият партийиси хитай даирилирини тәнқид қилған болуп, мәзкур партийиниң хәлқара ишлар мәсули "бизниң халиған кинони көрүш әркинликимиз бар. Бу сөз әркинлики вә ипадә әркинликиниң бир қисими" дегән.