Sürgündiki tibet rehbiri xitayning bir türküm tibetlerni sotlighanliqini tenqid qildi

Shinxu'a agéntliqining xewer qilishiche, xitay hökümiti sichüen, gensu ölkiliride 8 tibetlikni sotlap, “Bashqilarni hökümetke qarshi özini köydürüshke qutratquluq qilghan” dep eyibligen. Sot mehkimisi yuqiriqi 8 kishining birige ölüm jazasi bérip, ikki yil kéchiktürüp ijra qilishqa, qalghanlirini oxshimighan qamaq jazalirigha buyrughan.

Lobsang san'gayning ilgiri sürüshiche, özini köydürüsh weqelirini xitayning basturush siysiti keltürüp chiqarghan bolup, xitay hökümitining “Héchqandaq asasi we qanuniy tertipi bolmighan” saxta sot qilish yolini tutushi bir epsuslinarliq ish iken.

U, tibetlerning yéngi déhlidiki ming kishilik diniy pa'aliyitide qilghan sözide: ular uzun muddetlik qamaq jazasigha jümlidin kéchiktürüp ölüm jazalirigha höküm qiliwatidu. Bu nahayiti bir epsuslinarliq yüzlinish. Chünki özini köydürüshni basturush siyasiti keltürüp chiqarghan, dégen.

Hazirghiche rahib, rahibe we awam xelqlerdin bolup 100 ge yéqin tibet puqrasi özini köydürüsh arqiliq xitaygha naraziliq bildürgen. Tibet teshkilatlirining bildürüshiche, özige köydürgen 80 din artuq kishi hayatidin ayrilghan.

Lobsang san'gay ilgiri tibetlerni bu yilliq losar bayrimini tebriklimeslikke chaqirip, özini köydürüshte hayatidin ayrilghanlargha du'a-tilawet qilishni telep qilghan.