Xitay ürümchide '5 - iyul weqesi'ge munasiwetlik yene 22 Uyghur üstidin sot achti

Fransiye axbarat agéntliqining xewer qilishiche, Uyghur aptonom rayoni hökümitining bayanatchisi xo xenmin "bügün 5‏ - iyul weqesidiki gumandarlardin 22 kishilik bir guruppa sotlandi," dep tekitligen bolup, u sot hökümining bügün chüshtin kéyin élan qilinidighanliqini, lékin sot hökümitining tepsili détaligha da'ir mesililerde melumat bermeydighanliqini, buninggha da'ir melumatlarning hökümet metbu'atlirida élan qilinidighanliqini bildürgen.

Xitay hazirgha qeder "5 ‏- iyul weqesi"ge arilashqanliqini ilgiri sürgen tutqunlardin 41 kishige höküm élan qilip, bularning 12 nepirini ölüm jazasigha buyrughan. Ölüm jazasigha buyrulghanlardin 9 kishini bu yil 11 ‏- ayda étip tashlighan.

Ürümchidiki sot amérika dölet mejlisi, yawropa ittipaqi we xelq'ara kishilik hoquq teshkilatlirining tenqidige uchrap, xitay da'irilirining edliye tertipini bir chetke qayrip qoyghanliqini, eyiblen'güchilerning özini aqlash hoquqi ret qilin'ghanliqini, sot jeryanining xelq'ara ölchemlerge toshmaydighanliqini ilgiri sürgen.

Ürümchidiki bu qétimqi sot yéqinda kambodzha hökümiti 20 neper Uyghur musapirni xitaygha qayturup bérip, gherb ellirining we xelq'ara kishilik hoquq teshkilatlirining shiddetlik tenqidige uchrighan, b d t kishilik hoquq kéngishining ten jazasini tekshürüsh emeldari manfréd nowak Uyghur éligha tekshürüsh guruppisi ewetishni telep qilghan mezgilde échilghan.

Bu qétim sotlan'ghan 22 kishining qanche nepirining Uyghur ikenliki, ularning ichide ölüm jazasigha buyrulghanlarning bar - yoqliqi hazirgha qeder melum emes. Lékin xitay hökümiti buning aldida sot échip, ölüm jazasigha buyrughan kishilerning asasen hemmisi dégüdek Uyghurlar idi.