خىتاي ئۈرۈمچىدىكى باشلانغۇچ - ئوتتۇرا مەكتەپلەرنىڭ ئامانلىق تەدبىرلىرىنى كۈچەيتتى

ئۈرۈمچى شەھەر ج خ ئىدارىسى بۇيرۇقنامە چۈشۈرۈپ، مەكتەپ ۋە بالىلار باغچىلىرىنىڭ بىخەتەرلىكىگە تەھدىت سېلىش خاراكتېرلىك جىددىي ۋەقە يۈز بەرسە، ساقچى ۋە بىخەتەرلىك خادىملىرىنىڭ " دەرھال ھەم كەسكىن بىر تەرەپ قىلىشى"نى تەلەپ قىلغان.

لېكىن خەۋەرلەردە "دەرھال ھەم كەسكىن بىر تەرەپ قىلىش" دېگەنلىكنىڭ مەنىسى چۈشەندۈرۈلمىگەن. خىتايدا يېقىندىن بېرى، باشلانغۇچ مەكتەپ ۋە بالىلار باغچىلىرىغا ھۇجۇم قىلىپ، ئادەم ئۆلتۈرۈش ياكى بالىلارنى زەخمىلەندۈرۈش ۋەقەلىرى ئارقا - ئارقىدىن يۈز بەرگەن. 28 ‏- ئاپرىل كۈنى جياڭسۇدا بىر ئادەم بالىلار باغچىسىغا ھۇجۇم قىلىپ، 28 بالىنى پىچاقلاپ زەخىملەندۈرگەن ئىدى. بۇ خىتاي دائىرىلىرىنى ئوتتۇرا، باشلانغۇچ مەكتەپ ۋە بالىلار باغچىلىرىدا جىددىي بىخەتەرلىك تەدبىرى ئېلىشقا مەجبۇر قىلغان ئىدى.

لېكىن، ئۈرۈمچىدىكى ئوتتۇرا - باشلانغۇچ مەكتەپ ۋە بالىلار باغچىلىرىدا يولغا قويۇلغان بىخەتەرلىك تەدبىرى، 5" ‏ - ئىيۇل ۋەقەسى"نىڭ بىر يىللىق خاتىرە كۈنىگە يېقىنلاپ كېلىۋاتقانلىقى ياكى ئىچكىرىدە يۈز بەرگەن باشلانغۇچ مەكتەپ ئوقۇغۇچىلىرىغا ھۇجۇم قىلىش ۋەقەلىرى بىلەن مۇناسىۋەتلىك ئىكەنلىكى مەلۇم ئەمەس.