Хитай, уйғур вә тибәт яш - өсмүрлиригә ' милләтләр иттипақлиқи' тәрбийисини күчәйтти

2008 - Бейҗиң олимпикиниң алди ‏ - кәйнидә тибәт вә уйғур елидә хитай һөкүмитигә қарши йүз бәргән вәқәләрдин кейин, хитай даирилири уйғур вә тибәт яш өсмүрлиригә қарита сиясий идийиви тәрбийә һәм милләтләр иттипақлиқи тәрбийисини күчәйткән.
Мухбиримиз гүлчеһрә
2008-12-16
Елхәт
Пикир
Share
Принт

Бу һәқтә беританийә ахбаратиниң 16 - декабирдики хәвиридә көрситишигә қариғанда, йеқинда хитай маарип министирлики билән миллий ишлар комитетиниң мәхсус "милләтләр иттипақлиқи тәрбийиси тезиси"ни түзүп тарқатқан.

Мәзкур йеңи түзүлгән милләтләр иттипақлиқи тәрбийиси тизисида, һәр милләт яш өсмүрлирини өзликидин җуңгониң бирликини қоғдайдиған, милләтләр иттипақлиқини һимайә қилидиған вә миллий бөлгүнчилик һәрикәтлиригә қарши туридиған,сиясий идийиси мустәһкәм қилип тәрбийиләш тәләп қилинған.

Бу тизиста хитай һөкүмитиниң аз санлиқ милләтләргә әвзәл сиясәт қоллиниватқанлиқи, тибәт вә уйғур ели земининиң тарихтин буян хитайниң бир қисми икәнлики қатарлиқ мәзмунлар гәвдиләндүрүлгән.

Шуниң билән бир вақитта йәнә, даириләр мәзкур тизисни уйғур вә тибәттики башланғуч вә оттура мәктәп оқуғучилириға бир йилда аз дегәндә 8 саәттин 14 саәткичә дәрслик қилип орунлаштуруш уқтуруши чүшүргән.

Уйғур ели һәмдә тибәттә һәр саһә буйичә миллий бөлгүнчиликкә қарши сиясий тәрбийиләш давам қиливатқандин сирт, башланғуч, оттура мәктәпләрдә милләтләр иттипақлиқи тәрбийисини күчәйтип елип бериватқан бир пәйттә, хәлқара ахбаратларға баянат бәргән дуня уйғур қурултийи баянатчиси дилшат ришит "хитайда хитайлар нопуси %90 тин юқири болсиму, аталмиш милләтләр иттипақлиқи тәрбийисини пәқәт аз санлиқ милләтләргә мәҗбурий елип беришиниң өзила, хитайниң хитай билән башқа милләтләргә охшаш муамилә қилмайватқанлиқи һәмдә өзиниң миллий айримичилиқ, чоң милләтчилик сиясити йүргүзиватқанлиқиниң испати," деди.

Пикирләр (0)
Share
Толуқ бәт