Xitay, Uyghur we tibet yash - ösmürlirige ' milletler ittipaqliqi' terbiyisini kücheytti

2008 - Béyjing olimpikining aldi ‏ - keynide tibet we Uyghur élide xitay hökümitige qarshi yüz bergen weqelerdin kéyin, xitay da'iriliri Uyghur we tibet yash ösmürlirige qarita siyasiy idiyiwi terbiye hem milletler ittipaqliqi terbiyisini kücheytken.
Muxbirimiz gülchéhre
2008-12-16
Élxet
Pikir
Share
Print

Bu heqte béritaniye axbaratining 16 - dékabirdiki xewiride körsitishige qarighanda, yéqinda xitay ma'arip ministirliki bilen milliy ishlar komitétining mexsus "milletler ittipaqliqi terbiyisi tézisi"ni tüzüp tarqatqan.

Mezkur yéngi tüzülgen milletler ittipaqliqi terbiyisi tizisida, her millet yash ösmürlirini özlikidin junggoning birlikini qoghdaydighan, milletler ittipaqliqini himaye qilidighan we milliy bölgünchilik heriketlirige qarshi turidighan,siyasiy idiyisi mustehkem qilip terbiyilesh telep qilin'ghan.

Bu tizista xitay hökümitining az sanliq milletlerge ewzel siyaset qolliniwatqanliqi, tibet we Uyghur éli zéminining tarixtin buyan xitayning bir qismi ikenliki qatarliq mezmunlar gewdilendürülgen.

Shuning bilen bir waqitta yene, da'iriler mezkur tizisni Uyghur we tibettiki bashlan'ghuch we ottura mektep oqughuchilirigha bir yilda az dégende 8 sa'ettin 14 sa'etkiche derslik qilip orunlashturush uqturushi chüshürgen.

Uyghur éli hemde tibette her sahe buyiche milliy bölgünchilikke qarshi siyasiy terbiyilesh dawam qiliwatqandin sirt, bashlan'ghuch, ottura mekteplerde milletler ittipaqliqi terbiyisini kücheytip élip bériwatqan bir peytte, xelq'ara axbaratlargha bayanat bergen dunya Uyghur qurultiyi bayanatchisi dilshat rishit "xitayda xitaylar nopusi %90 tin yuqiri bolsimu, atalmish milletler ittipaqliqi terbiyisini peqet az sanliq milletlerge mejburiy élip bérishining özila, xitayning xitay bilen bashqa milletlerge oxshash mu'amile qilmaywatqanliqi hemde özining milliy ayrimichiliq, chong milletchilik siyasiti yürgüziwatqanliqining ispati," dédi.

Toluq bet