Xitay Uyghur rayonining chégra muqimliqining nöwettiki eng muhim mesile ikenlikini eskertti

Tengritagh xewerliridin melum bolushiche, Uyghur rayonluq siyasiy qanun komitétining sékrétari fuchyang 21-féwral künidiki chégra mudapi'e bash etritining 11-omumiy yighinida qilghan sözide, Uyghur rayonining muqimliqining nöwettiki eng muhim mesile ikenlikini alahide eskertip, chégra qisimlirini muqimliqni ishqa ashurush üchün ejellik zerbe bérish we tüzesh kürishini qanat yaydurushqa, térror pa'aliyetlirige qattiq zerbe bérishke chaqirghan.

Xitay hökümiti shinjang xizmiti yighinidin kéyin, Uyghur rayonining muqimliqini ishqa ashurushning bir tedbiri süpitide xitay köchmenlirini Uyghur rayonigha yötkesh sür'itini téximu tézletken idi.

Chet'ellerdiki Uyghur teshkilatliri bolsa xitay köchmenlirining Uyghur rayonigha köplep kélip, Uyghurlarning yashash shara'itlirini tarlashturuwatqanliqini we ularning alahide imtiyazlargha ige bolup, yerlik Uyghurlarni chetke qéqiwatqanliqini we buning rayondiki milliy ziddiyetning tüp yiltizi ikenlikini ilgiri sürüp kelmekte.

Derweqe, siyasiy qanun komitétining sékrétari fuchyang yighinida qilghan sözide chégra qisimliridin, chégra rayondiki köchme nopusni téximu yaxshi ijtima'iy mulazimet bilen teminleshni, ularning amanliqigha kapaletlik qilishni alahide telep qilghan.