Uyghur darwaz yene yéngiliq yaritishqa bel baghlidi

Xunen ölkisining jangjajyé isimlik jayidiki ti'enmén téghigha tartilghan uzunluqi 700 métirliq simdin méngip ötüsh maharitini 18 - öktebir küni ataqliq darwaz adil hoshurning tughqanliridin biri abdusemet hesen körsetti.
Muxbirimiz ümidwar
2008.10.19

Shinxu'a agéntliqi bu heqte xewer tarqatqan bolup, abdusemet hesen mangghan tagh jilghisigha tartilghan polat simning tik yantuluq derijisi yuqiri bolup, nahayiti xeterlik hésablinidiken.

Abdusemet hesen mundaq xeterlik sim üstide 650 métir etrapida mangghandin kéyin yantuluq derijisi yuqiri we simning lingshish derijisi éghir bolghanliqi üchün méngishni dawamlashturushqa qiynalghanda uni közitip turghan urugh - tughqanlirining qet'iy telep qilishi bilen méngishni toxtatqan iken.

Téléwiziyide neq meydan körsitishni körgenlerning Uyghur tor betliride inkas qilishiche, yash darwaz özining dawamliq mangidighanliqini éytqan bolsimu, töwendikilerning qayta - qayta telep qilishigha boysunushqa mejbur bolghan shuningdek qutquzush xadimlirining yardimi bilen xeterdin qutulup, saq - salamet yerge chüshken.

24 Yashliq abdusemet hesen yenila uzunluq we tik - yantuluq derijisi eng yuqiri simda méngish üchün heriket qilghan tunji adem bolup hésablinidiken. U 17 - öktebir küni jangjajyé shehiride muxbirlarni kütüwélish yighini ötküzüp, özining mezkur müshkül ötkeldin ötidighanliqini jakarlighan iken.
 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.