“Jungxu'a milletlirining büyük ittipaqliqi” Uyghur élidiki toluq ottura mektep derslikige kirgüzüldi

Xitay ma'arip xewerlirining xewiridin qarighanda mezkur oqushluqni shinjang ma'arip nazariti tüzüp chiqqan bolup, u jungxu'a milletliri, döletning birliki, ittipaqliship tereqqiy qilish we tüzüm kapaliti qatarliq 4 bölümdin terkib tapqan.

Da'iriler jungxu'a milletlirining büyük ittipaqliqini derslik qilip oqutushning meqsitini oqughuchilarning jungxu'a milletlirining büyük ittipaqliqigha bolghan tonushini we mes'uliyet tuyghusini ashurush, dep körsetken.

Xitay da'irilirining yéqindin buyan Uyghur élidiki yash-ösmürlerge qaritilghan idiye-teshwiqat xizmitini kücheytiwatqanliqi bayqalmaqta. Chünki, téxi yéqindila Uyghur rayoni aliy mekteplerde wetenni tonush, jungxu'a millitini tonush, jungxu'a medeniyitini tonush, junggoche alahidilikke ige sotsiyalizmni tonushtin ibaret “Tötni tonush” idiyisi oqutushini oqutush xizmetliridiki muhim türlerning biri qilip kirgüzgen idi.

Bügün dunya Uyghur qurultiyi weqege inkas qayturup, xitay hökümitining ma'aripni siyasiylashturush arqiliq, Uyghur yashliri üstidin “Ménge yuyush herikiti” yürgüzüwatqanliqini bildürdi. Dunya Uyghur qurultiyi bayanatchisi dilshat rishit sözide eskertip, Uyghurlarning kishilik hoquqigha hörmet qilmay turup, ulargha barawer mu'amile qilmay turup, atalmish jungxu'a milletlirining büyük ittipaqliqini tekitleshning héchqandaq ünüm hasil qilmayla qalmastin, belki eks tesir yaritidighanliqini agahlandurdi.