Uyghur élining jungghar oymanliqidin yene zor miqdarda tebi'iy gaz zapisi bayqaldi

Uyghur élining jungghar oymanliqidin yene zor kölemlik tebi'iy gazliq bayqalghan bolup, tengritagh torining körsitishiche, mezkur gazliqtin nöwette bayqalghan tebi'iy gaz yüz milyard kub métirdin köp, omumiy zapas miqdari 200 milyard kup métir iken.
Muxbirimiz jüme
2008.12.15

Xewerde otturigha qoyulushiche, mezkur gazliqni xitay dölet igidarchiliqidiki junggo néfit we tebi'iy gaz hessidarliq shirkiti qarmiqidiki shinjang néfit burghilap tekshürüsh shirkiti bayqighan.

Melum bolushiche, mezkur tebi'iy gazliq mezkur shirket tunji qétim bayqighan 100 milyard kub métirliq tebi'iy gazliq bolup, eng az dégendimu 50 yil gaz ishlepchiqarghili bolidiken.

Sanliq melumatlargha qarighanda, jungghar oymanliqida jem'iy 2.5 Tirilyon kub métir tebi'iy gaz zapisi bar bolup, nöwette buningdin peqet 10 pirsentila bayqalghan.

Uyghur élidiki néfit we tebi'iy gazliqlarning köpinchisini xitayning dölet igidarchiliqidiki junggo néfit we tebi'iy gaz hessidarliq shirkiti kontrol qilidighan bolup, jungghar néfitliki mezkur shirket meblegh sélip yasap chiqqan "gherbning gazini sherqqe yötkesh turuba liniyisi" ning muhim gaz teminlesh tügünliridin biri.

Xitay tebi'iy bayliq uchurliri torida körsitilishiche, ötken yilida shinjang néfit shirkiti jungghar néfitlikidin 2 milyard 900 milyon kub métir tebi'iy gaz ishlepchiqarghan bolsa 2015 - yiligha barghanda yilliq ishlepchiqirish nisbitini 10 milyard kub métirgha yetküzmekchi.

Halbuki, mezkur gazliqtin qéziliwatqan tebi'iy gazlar "gherbning gazini sherqqe yötkesh turuba liniyisi" bilen biwasite xitay sheherlirige toshup kétilidighan bolup, bu gazlardin kélidighan iqtisadi kirimdin yerlik xelqqe qanchilik nep tégidighanliqi téxi melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.