Uyghur élidiki mekteplerde "Wetenperwerlik" terbiyisi kücheytilmekte

Xitayning teshwiqat da'iriliri Uyghur éli miqyasida "Ulugh wetenni qizghin söyüp, güzel yurt berpa qilish" herikitini yolgha qoyghandin béri, herqaysi bilim yurtliridiki wetenperwerlik öginishlirining salmiqi ashurulghan.
Muxbirimiz irade
2012-09-27
Share


Uyghur biz torining bu heqtiki xewiridin melum bolushiche, Uyghur élidiki noqtiliq aliy mekteplerdin biri bolghan shinjang pidagokikga uniwérsitéti yuqiridiki heriketke qizghin awaz qoshup, oqughuchilargha wetenni tonush, jungxu'a millitini tonush, jungxu'a medeniyitini tonush, junggoche alahidilikke ige sotsyalizmni tonushtin ibaret "Tötni tonush" idiyisi oqutushini oqutush xizmetliridiki muhim türlerning biri qilip kirgüzgen.

Bu heriket hazir peqet uniwérsitétlar bilenla cheklinip qalmay, belki Uyghur éli miqyasidiki barliq ottura - bashlan'ghuch mektepler we hetta yeslilergiche keng omumlashturulghan bolup, oqughuchilarning ders öginidighan waqtida köpinche hallarda türlük siyasiy öginish bilen meshghul bolidighanliqi melum. Téxi yéqindila, xitay ölkiliridiki shinjang toluq ottura siniplirigha ders bériwatqan bir xitay oqutquchimu ashkara élan qilghan xétide, shinjang siniplirining ehwalining Uyghur élidin perqliq emeslikini, Uyghur éli ma'arip organlirining biwaste bashqurushi astidiki shinjang sinipliridiki oqughuchilarning derstin srt türlük siyasiy öginishlerdin bash kötürelmeydighanliqini inkas qilghan idi.

Uyghur biz tori mulahiziside, wetenni söyüsh idiyisini asas qilghan ma'aripning Uyghur élide eng aktip yürgüzülgenlikini, oqughuchilarning normal ders öginidighan waqtining köpini siyasiy öginishke serp qilidighanliqini tekitlep, Uyghurlarning ana tili, milliy örp - adetlirige hörmet qilishning ornigha kechkiche "Wetenni söyüsh" ni tekitlesh emeliyette eks tesir peyda qilidu dep agahlandurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet