Amérika dölet mejliside Uyghur, tibet, mongghul mesililiri heqqide muhakime yighini ötküzülidu

“Xitaydiki qerellik bomba: xitay yéngi rehberliri duch kéliwatqan étnik krizis” dégen témidiki mezkur yighinni amérikida pa'aliyet qilidighan xitay démokratlirining “Junggo puqralar küchi” namliq teshkilati uyushturghan.

Mezkur teshkilatining ilgiri sürüshiche, junggoda rehberlik qatlimi almishiwatqan nazuk mezgilde, junggo özining shimali we gherbidiki rayonlarda étnik krizisqa duch kelgen bolup, bu mesile kelgüside béyjingdiki yéngi rehberler duch kélidighan zor riqabetlerning biri.

Yéqinqi bir qanche yildin béri tibet, sherqiy türkistan we jenubiy mongghuliyide yüz bergen étnik turaqsizliq memliket ichi we sirtidiki kishilerge junggoning az sanliq milletler siyasitide éghir mesile barliqi, az sanliq milletlerning hazirqi hökümetke naraziliqi barghanche küchiyiwatqanliqidin signal bergen.

Yighinda amérika Uyghur jem'iyitining re'isi alim séyitof, xelq'ara tibet herikiti teshkilatining alahide programma mu'awin mes'uli buchung shérin, jenubiy mongghuliye kishilik hoquq uchur merkizining mes'uli énxibatu tughuchuq, junggo puqralar küchi teshkilatining re'isi yang jyenli qatarliq kishiler doklat béridu.

Mezkur pa'aliyetni uyushturghan “Junggo puqralar küchi” teshkilatining bildürüshiche, yighinda “Milliy siyasettiki eng zor mesililer néme?”, “Bu mesililerning hazirqi étnik turaqsizliqlar bilen qandaq munasiwiti bar?” qatarliq témilarda muzakire ötküzülidiken.