Béyjingdiki bir Uyghurning pasport shikayiti wéybo toridin öchürüwétildi

Tor ismi Uyghur way bolghan bu tordash béyjingdiki melum bir uniwérsitétining 3-yilliq oqughuchisi bolup, u chet'elge chiqish üchün pasport ishletmekchi bolghan. Uning nopusi béyjingda bolghanliqi üchün, béyjingdiki pasport ishleydighan orun'gha iltimas qilghan. Emma aridin 27 kün ötkendin kéyin da'iriler uninggha téléfon qilip “Kechürgin, biz sanga pasport ishlep bérelmigüdekmiz, silerning u yerdin bizge shundaq yolyoruq keldi” dégen.

Mezkur Uyghur oqughuchi intérnétta yene, Uyghur élidiki tarmaqlarning özining ata-anisini izdep, balisining chet'elge chiqish sewebini sürüshtürgenlikini inkas qilip: “Junggoning qanunida herqandaq junggo puqrasi 9 kün ichide pasport alalaydu déyilgen. Biz Uyghurlar némishqa alalmaymiz. Méning nopusum béyjingda tursa, méning matériyalim néme üchün shinjanggha yollinidu?” dep shikayet qilghan.

Uyghur biz torining xewer qilishiche, mezkur téma wéybo torida xéli munazire qozghighan, emma qandaqtur bu téma 13-dékabir künige kelgende öchürüwétilgen. Shundaqtimu bezi tordashlar bu témini qayta yollighan. Ehwalni inkas qilghan bu Uyghur oqughuchi wéybo toridiki barliq xitaylarni xoten yangqallisi mesiliside qandaq munazire qilip ketken bolsa, bu mesiligimu diqqet qilip qoyushini telep qilghan.

Uyghurlarning pasport ishlitishining qéyin bolushi xelq'ara kishilik hoquq organliriningmu diqqitini tartqan bir mesile. Ularning éytishiche, xitay da'iriliri xitaylarning pasport béjirishini barghanséri asanlashturghanning eksiche, Uyghurlarning pasport béjirishini eqilge toghra kelmeydighan türlük bahane-sewebler arqiliq qiyinlashturup, Uyghurlarning erkin sayahet qilish erkinlikini qattiq boghmaqta.