خىتاي دائىرىلىرىنىڭ بۇ مەبلەغ سېلىش پىلانى بەش يىلنى مۆلچەر قىلغان بولۇپ، ئۇيغۇر سەبىيلەر مائارىپىنى قوش تىللاشتۇرۇشقا ئاجرىتىلىدىغان مەزكۈر مەخسۇس مەبلەغنىڭ ئىككى يۈز مىليوندىن كۆپرەكى قەشقەر، خوتەن، ئاقسۇ ھەم قىزىلسۇنى ئۆز ئىچىگە ئالغان جەنۇبىي ئۇيغۇر ئېلىنىڭ بالىلار مائارىپىغا سەپلىنىدىكەن.
خىتاي دائىرىلىرى يېقىنقى يىللاردىن بۇيان ئۇيغۇر ئېلىدىكى ئاز سانلىق مىللەت سەبىيلەر مائارىپىنى قوش تىللاشتۇرۇش پىلانىنى ئىشقا ئاشۇرۇش داۋامىدا ئۇيغۇرلار زىچ ئولتۇراقلاشقان يېزا - كەنتلەرگىچە قوش تىل بالىلار باغچىلىرىنى قۇرۇپ،خىتاي بالا تەربىيىچىلىرىنى كۆپلەپ ئورۇنلاشتۇرۇش ئارقىلىق، ئۇيغۇر بالىلىرىنىڭ دەسلەپكى ئاڭ تەربىيىسىنىمۇ خىتاي تىلى ئارقىلىق ئېلىپ بارماقتا.