Уйғурбиз тор бети “шинҗаңдики чоң хәнзучилиқниң пакитлири” дегән темида инкас вә муназирә башлиди

Бейҗиңдики мустәқил тәтқиқатчи илһам тохти башқуруватқан уйғурбиз тор бети бүгүн, “шинҗаңдики чоң хәнзучилиқниң пакитлири” дегән темида инкас вә муназирә башлиди.
Мухбиримиз шөһрәт һошур
2011.11.07

Торбәттә бу муназириниң мәқсити, “шинҗаң һөкүмити вә мәркизи һөкүмәтниң, шинҗаңдики милләтләр мәсилисиниң йилтизини тепип чиқишиға ярдәм бериш” дәп чүшәндүрүлгән.

Муназиригә йезилған тунҗи инкаста, уйғур елидики қош тиллиқ маарипта, уйғурларға хитай тили өгинишни шәрт қилип, хитайларға уйғурчә өгинишни шәрт қилмиғанлиқи баян қилинған.

Униңдин кейинки инкаста, уйғур районидики барлиқ сот вә тәптиш орунлирини пүтүнләй хитайларниң монопол қиливелиши, райондики чоң хәнзучилиқниң ялиңач ипадиси дәп көрситилгән. Йәнә бир инкаста, районниң йәр асти байлиқлириниң үн-тизсиз һалда елип кетилип, районға мәркәздин бериливатқан аз миқдардики ярдәм пулиниң юқири авазда тәшвиқ қилиниватқанлиқи тилға елинған.

Уйғур биз тор бети бу йил вә өткән йил ичидә уйғур елидә бир йүрүш рай синаш елип берип, уйғурларниң хитайлар билән дост болушни халимайдиғанлиқи қатарлиқ бир қатар иҗтимаий вә сиясий һадисиләрни җәмийәткә ашкарилиған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.