Уйғур елидә әйдизниң җинсий алақә йоли арқилиқ юқуш нисбити ашмақта

Уйғур аптоном районлуқ әйдизниң алдини елиш комитети ишханисиниң тарқитишичә, уйғур елиниң бу йиллиқ әйдиз юқум әһвалини статистика қилип тәкшүрүш нәтиҗисидин, уйғур ели әйдиз вәзийити йиллардикидинму еғирлашқан, шундақла юқумдарлар яшлашқан болуп, җинсий алақә вәқәси билән әйдиз кесили вируси юқтурувалғучилар көринәрлик көпәйгән.
Мухбиримиз гүлчеһрә
2008-12-02
Share

Йәни бу йил үч пәсилдики йеңидин мәлум болған әйдиз юқумдарлири3777 нәпәр болуп бу сан бултурқи бир йиллиқ әйдиз юқум истатистика санидинму юқири икән.

Илгирики йилларда уйғур елидики әйдиз юқумдарлириниң асасән зәһәрлик чекимликни охшаш шипириста окул қилғанлиқ сәвәбидин өз ара юқумланғанлар юқири нисбәтни игилигән болса, нөвәттә уйғур елидики әйдиз юқум сәвәблири барғансири мурәккәплишиватқан болуп, әйдиз юқумдарлириниң ичидә пәқәт җинсий алақә йоли арқилиқ юқтурувалғучилар %29 тин ашидикән. Бу әйдизниң тарқилишини тизгинләшниң йәниму мушәққәтлик болидиғанлиқидин сигнал бәрмәктә.

Нөвәттә уйғур ели әйдиз юқумдарлири сани җәһәттә хитай бойичә төтинчи орунда болуп, әйдиз юқумдарлири ичидә 20 яштин 40 яшқичә болған арилиқтикиләр %90 игиләйду.

Мутәхәссисләр җинсий алақә вастисиниң уйғур елидә асаслиқ әйдиз юқум йолиға айлинишида, уйғур елидә аққун нопусиниң көпийиши, буларниң ичидә җинсий мулазимәт билән шуғуллинидиғанлар нисбитиниң юқирилиқи, түрлүк җинсий мулазимәт сорунлириниң қалаймиқан әвҗ елиши, җәмийәт әхлақиниң бузулуши һәмдә йәрлик хәлқләрдә җинсий кесәлликләрниң алдини елиш һәмдә өзини қоғдаш еңиниң төвәнлики қатарлиқларниң сәвәб болуватқанлиқини тәкитлимәктә.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт