خەۋەردىن يەنە مەلۇم بولۇشىچە، ئۇيغۇر ئېلىدە 2007 - يىلى ئىشلەپچىقىرىلغان خام نېفىت مەھسۇلات مىقدارى 26 مىليون 400 مىڭ توننىغا، تەبىئىي گاز مىقدارى 21 مىليارد 100 مىليون كۇپمېتىرغا يېتىپ، بۇ رايون پۈتۈن خىتاي بۇيىچە ئەڭ چوڭ نېفىت، تەبىئىي گاز ئىشلەپچىقىرىش رايونىغا ئايلانغان.
خىتاي ھۆكۈمىتى، ھازىرغا قەدەر غەربنىڭ گازىنى شەرىققە يەتكۈزۈش، خىتاي - قازاقىستان خام نېفىت تۇرۇبا لىنىيىسى، ئۈرۈمچى - لەنجۇ تەييار ماي تۇرۇبا لىنىيىسى، غەربىي دىيار خام نېفىت تۇرۇبا لىنىيىسى قاتارلىق نېفىت قۇرۇلۇشلىرىنى ئىشقا ئاشۇرۇپ، خىتاي شەھەرلىرىنى يېقىلغۇ ۋە ئېنىرگىيە بىلەن تەمىنلىمەكتە ھەمدە بۇنىڭدىن كۆپ ئىقتىسادىي مەنپەئەتلەرگە ئېرىشمەكتە.
بىراق، چەتئەللەردە ئۇيغۇرلارنىڭ سىياسىي مەنپەئەتى ئۈچۈن پائالىيەت ئېلىپ بېرىۋاتقان ئۇيغۇر تەشكىلاتلىرى ئىزچىل تۈردە، ئۇيغۇر دىيارىدىكى مول نېفىت بايلىقىدىن ئۇيغۇر خەلقىنىڭ قىلچە مەنپەئەتلىنەلمەي كېلىۋاتقانلىقىنى، دېھقانلارنىڭ تۇرمۇش سەۋىيىسىنىڭ تۆۋەنلىكىنى، ئۇيغۇر ئىشسىزلار سانىنىڭ كۆپلىكىنى، ئومۇمەن ئۇيغۇرلارنىڭ نامراتلىقتا ياشاۋاتقانلىقىنى ئىلگىرى سۈرمەكتە.