Хитай даирилири бейҗиңда тизгинәк арқилиқ башқурулидиған оюнчуқ тик учар сетишни чәклиди

Даириләр пәқәт 3-4 метир даирә ичидә учалайдиған тизгинәклик айропилан, тик учарларни сетишқа йол қойған болсиму, бирақ бу хил оюнчуқларни херидар кинишкисини чиқирип, кимликини испатлиғандила сетип бериш тәләп қилинған. Хитай даирилири буниңдин бурун тәдбир қоллинип, бейҗиңдики хитай өктичилирини тәқиб астиға алған, әрздарларни юртиға қоғлиған, уйғурларға ятақ беришни чәкләп, пойиз вә айропиландики уйғур йолучиларни тәқиб қилишни күчәйткән иди.

Шинхуа ахбарат агентлиқиниң хәвәр қилишичә, бейҗиң шәһири 18‏-қурултай мәзгилидә бихәтәрликни сақлашқа бир милйон 400 миң пуқрани сәпәрвәр қилған. Мәркизи нюйорктики кишилик һоқуқни көзитиш тәшкилатиниң билдүрүшичә, даириләр атақлиқ хитай өктичи ху җяниң бейҗиңдин кетип, униң бир мәзгил әнхуйдики юртида туруп турушини тәләп қилған. Буниңдин илгири даириләр бейҗиңдики атақлиқ мустәқил зиялий илһам тохтиниңму бир мәзгил бейҗиңдин кетип турушини тәләп қилған. Илһам тохти һазирғичә бейҗиңдин кәтмигән болсиму, бирақ униң иш-һәрикити тәқиб қилинған. Хитай компартийисиниң 18‏-қурултийи 8‏-ноябир башлиниду.