Ватслав хавел хитайни кишилик һоқуққа һөрмәт қилишқа чақирди

Сабиқ чехийә президенти ватслав хавел җүмә күни америкиниң Wall Street Journal гезитидә мақалә елан қилип, хитай даирилирини кишилик һоқуқ вә демократийигә һүрмәт қилиш, өз пикридә чиң турған кишиләрни бастурушни тохтитишқа чақирди.
Мухбиримиз әркин
2008.12.19

Ватслав хавел Wall Street Journal дики мақалисидә 5000 ға йеқин хитай өктичи зиялийсиниң йеқинда асасий қанун 2008 ‏ - йил чақириқнамиси елан қилип, асаси кишилик һоқуқ, әдлийә мустәқиллиқи вә демократийә тәләп қилғанлиқини қоллайдиғанлиқини билдүргән.

Асасий қанун 2008 ‏ - йил чақириқнамисиниң кишини тәсирләндүридиған бир һөҗҗәт икәнликини тәкитлигән ватслав хавел, униң "кишилик һоқуқ, яхши башқуруш, пуқраларниң мәсулийәтчанлиқиға һөрмәт қилип, өз һөкүмитини даимлиқ назарәт қилиш, дөләтләрниң заманиви очуқ җәмийәттә рол ойнишиға капаләтлик қилиш" ни мәқсәт қилған низамнамә икәнликини тәкитлигән.

Ватслав хавел 1977 ‏ - йили чехиславикийидә ислаһат елип беришни тәләп қилидиған асасий қанун77 ‏ - йил чақириқнамисини түзүшкә қатнашқанлиқтин қолға елинип түрмидә ятқан иди. Хавел мундақ дәйду": хитай һөкүмити 77 ‏ - йил низамнамә һәрикитидин савақ елип, қорқутуш, тәшвиқат һәрикити вә бастурушлар диалогниң орнини басалмайдиғанлиқини билиши керәк."

Ватслав хавелниң әскәртишичә, қолға елинған өктичи зат лю шавбо дәрһал вә шәртсиз қоюп берилгәндила андин бейҗиңниң савақ алғанлиқи намайән болидикән. У йәнә, хитайниң асаси қанун 2008 ‏ - йил чақириқнамисиға имза қойғучиларни җазалаш әмәс, улар билән сөһбәт елип бериши керәкликини тәкитлигән.

Лю шавбо қатарлиқ хитай зиялийлири йеқинда 2008 ‏ - йил асасий қанун низамнамисиға имза қоюп, хитай даирилирини сияси ислаһат елип беришқа чақирған, лекин хитай һөкүмити имза қоюш һәрикити башлиған лю шавбони қолға алған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.