Xitayning wyétnam, filippin qatarliq döletler bilen bolghan jenubiy déngiz igilik hoquq ixtilapi ilgirilep jiddiyleshti

Filippin bolsa xitayni filippin déngiz tewelikige kirmeslikke agahlandurdi. Xitay axbarat wasitilirining jüme küni ashkarilishiche, xitay déngiz armiyisi yéqinda jenubiy déngizda üch kéche-kündüz herbiy manéwir ötküzgen. “Xelq géziti” ning bu heqtiki xewiride manéwirgha charlash paraxoti, quruqluqqa chiqish paraxoti we su asti paraxoti bolup, jem'iy 14 herbiy kéme qatnashqanliqini bildürgen. Lékin xewerde manéwirning qeyerde we qachan ötküzülgenliki tilgha élinmighan.

Buningdin sirt “Azadliq armiye” gézitining bügünki xewiride, xitay déngiz armiyisining buningdin bashqa bir manéwir élip barghanliqini ashkarilidi.

Lékin,filippin prézidénti bénigno akéno jüme küni xitayni agahlandurup, xitayning filippin igilik hoquq da'irisidiki déngizgha kirmeslikini telep qilghan. U, xitay bilen herbiy hazirliqlar musabiqisige chüshmeydighanliqini, biraq hoquqini qoghdaydighanliqini bildürgen.

Xitay bolsa déngiz charlash qisimlirining sanini köpeytidighanliqini jakarlap, hazirqi 9 ming kishilik charlash etritini 2020‏-yildin burun 15 minggha yetküzidighanliqini élan qildi. Filippin dölet mudapi'e ministirliqi shu küni filippinning ixtilaptiki jenubiy déngizgha herbiy paraxot ewetidighanliqini bildürgen.