Хитай муавин баш министири ли кечяң австралийидә рәсмий зиярәттә болмақта

Гәрчә нурғун кишиләр хитай тилини интайин яхши билидиған кевин руд австралийигә баш министир болғандин кейин икки дөләт мунасивитиниң қоюқлишип кетидиғанлиқини пәрәз қилған болсиму, әмәлийәт буниң әксичә болуп икки дөләт мунасивити йириклишип кәткән иди.

Бу йириклик хитайниң австралийиниң рио-тенто кан ширкитиниң хитайда турушлуқ мәсуллирини қолға елиши билән башлинип, рабийә қадир ханимниң мелборн филим фестивалиға қатнишиш үчүн австралийигә бериш мәсилиси билән техиму әвҗигә чиқти. Гәрчә хитай һөкүмити рабийә қадир ханимға виза бәрмәслики үчүн австралийигә депломатик йоллар арқилиқ беисм ишләткән болсиму, әмма униң пайдиси болмиған иди. Буниңға нарази болған хитай һөкүмити ли кечяңниң 8 - айда австралийигә елип баридиған зияритини әмәлдин қалдурғанлиқини елан қилған.

Кейин австралийә даирилири хитайниң әң чоң полат - төмүр завутиниң австралийидики бир төмүр рода кениға мәбләғ селишини дөләт бихәтәрлик мәсилисигә четилидиғанлиқи сәвәби билән тосқан иди.

Икки дөләт мунасивити яманлишип кәткән мушундақ бир пәйттә, хитай ташқи ишлар министирлиқи баянат берип, австралийә билән болған мунасивәтлириниң яманлишип кетишни халимайдиғанлиқини, икки тәрәпниң бир - биригә һөрмәт қилған асаста мәсилилирини һәл қилип кетәләйдиғанлиқини ипадә қилған иди.

Ли кечяңниң бу қетим австралийигә елип баридиған зиярити икки дөләт оттурисидики музларни еритиш вә ихтилапларни һәл қилишниң чарисини издәш үчүн елип берилған бир зиярәт дәп қаралмақта. Ли кечяң бу зияритидә австралийә баш министири кевин руд билән учришиду.

Мәлум болушичә ли кечяң австралийә зияритини аяқлаштурғандин кейин йеңи зеландийә вә папуа нюгина қатарлиқ дөләтләрдиму зиярәт елип баридикән.