Xitay Uyghur rayonida dölet bayrimi munasiwiti bilen qattiq tedbirler almaqta

16 - Sintebir küni Uyghur rayonluq qatnash - transiport bashqurush idarisi uqturush chiqirip, her qaysi sheherler arisida qatnaydighan uzun yolluq aptobus shirketliridin öktebir bayrimi mezgilidiki bixeterlikke kapaletlik qilishni telep qilghan. Buning üchün sheherler ara qatnaydighan uzun yolluq yoluchilar aptobusigha choqum birdin amanliq qoghdash xadimi qoyush uqturulghan.

Melum bolushiche, bu amanliq qoghdash xadimi her bir yoluchining somkisini échip tekshüridiken we her qandaq bir gumanliq kishi we heriketke qarita derhal tedbir qollinidiken hemde buni munasiwetlik organlargha melum qilidiken.
 
Uyghur rayonluq qatnash - transport idarisi her derijilik orunlardin her qandaq yoluchilar we yük aptobusini qattiq tekshürüshni, gumanliq ehwal we xeterlik maddilar bayqalghanda waqtida tedbir élishni, yoluchilar we ularning yük- taqilirini qattiq tekshürüshni telep qilghan we her bir uzun yolluq yoluchilar aptobosida choqum birdin amanliq qoghdash xadimi bolushi kéreklikini qattiq tekitligen.

Xitay hazir dölet bayrimining amanliqigha kapaletlik qilish namida pütün dölet miqyasida türlük tedbirlerni éliwatqan bolup, béyjing shehiridimu 1 milyon kishi kocha - kochilarda charlashqa qoyulghan idi. Bu ehwallar xelq'ara metbu'atning qattiq diqqitini qozghimaqta.