Xitay, yéngi yildin bashlap intérnét arqiliq erz qobul qilmaqchi

Xitay döletlik erziyet idarisining tor bet mulazimet ishxanisidikilerning bildürüshiche, mezkur orun hazirche peqet déhqanchiliqqa da'ir erzlernila qobul qilishqa mexsus adem békitken bolup, xitayning her qaysi jayliridin erziyetchiler özliri kelmey turupmu, erziyet idarisining intérnét tor bétide ilxet arqiliq erzini yollisa bolidiken.

Béritaniye axbaratining körsitishiche, bu yil 7 - ayda xitay bixeterlik ministiri, erziyetchilerni bashqurush heqqide échilghan yighinda imkan qeder erziyetchi ammining béyjinggha kélishining aldini élip béyjing olimpikini erziyetchilerning qlaymiqanchiliqidin xali qilish kéreklikini otturigha qoyghan.

Xitay hökümiti üstidin béyjinggha erz qilip barghuchi amma dawamliq türde xitay saqchilirining qopalliq bilen tosqunluq qilishi, zorawanliqi hem tutqun qilishigha uchrap kelmekte.

Közetchiler, gerche xitay da'irilirining intérnét arqiliq erz qobul qilishni yolgha qoyushi erziyetchi puqralarni béyjinggha bérip uwalchiliqqa uchrashtin nisbeten saqlap qalsimu, buning bilen xelqning barliq erzining alaqidar da'iriler teripidin étibargha élinishidin we muwapiq hel qilinishidin anche ümid kütkili bolmaydu dep qarimaqta.

Nöwette xitayda intérnét abontliri 250 milyondin ashidighan bolup, xitay hökümiti intérnét torining hem ammining intérnét arqiliq yürgüzüwatqan munazirilirige diqqet bilen qarimaqta hem amalning bariche ammining tor arqiliq erkin pikir bayan qilishini qamal qilip kelmekte.