Bir xitay erzdar hökümet binasini partlitip 6 kishini yaridar qildi

Shinxu'a agéntliqining xewer qilishiche, mezkur erzdarning ismi chü xu'achyang bolup, u hujumdin kéyin özini öltürüwalghan. Mezkur xewer nöwette xitayning mikrobloglirida keng tarqalmaqta we xitay tor ezaliri xitayning erziyet sistémisini tenqid qilmaqta.

Fransiye axbarat agéntliqining bu heqtiki xewiride bayan qilishiche, yü jyenrung isimlik bir xitay tor ezasi xitayning erziyet sistémisini saxtipezlik bilen eyibligen we bu sistéma bezi kishilerni aldash, qaymuqturush rolini oynisa, yene bezi kishilerni zorawanliq yollirigha mejburlawatqanliqini bayan qilghan.

Daw wangsey isimlik biri bolsa “Erziyet sétimisi erzdarlar üchün bir tuzaq, men buning islah qilinishigha terepdar” dep yazghan. Yene bir tor ezasi, partlitish hujumi élip barghan erzdar chü xu'achyangni qehriman dep medhiyilep uninggha hörmet bildürgen. Xitay tor betliride mezkur weqe seweblik xitayning erziyet sétimisi qattiq tenqidke uchrighandin kéyin, shinxu'a agéntliqi, burunqi xewirini özgertip, hujumchining erzdar ikenlikini yoshurushqa bashlighan.